बोईसर आगारातील बस
अपघातात चालक जखमी
बोईसर, ता. १४ (बातमीदार) : बोईसर एसटी आगारात सोमवारी दुपारी नियंत्रण सुटल्याने बस थेट नियंत्रण कक्षाजवळील हिरकणी कक्षाला धडकली. या अपघातात चालक आदिनाथ कुटे हे गंभीर जखमी झाले आहेत. त्यांना तातडीने जवळच खासगी रुग्णालयात दाखल करण्यात आले आहे.

बसमध्ये चालक आणि वाहक यांच्याशिवाय इतर कोणीही प्रवासी नव्‍हते. बसने धडक दिल्याने हिरकणी कक्षाचे मोठे नुकसान झाले आहे. चालक आदिनाथ कुटे हे दोन आठवड्यांपूर्वीच कामावर रुजू झाले आहेत. सोमवारी दुपारी सुमारे दोन वाजता ते बस देखभाल विभागातून बस पार्किंग क्षेत्रात नेत असताना त्यांचे बसवरील नियंत्रण सुटले आणि हा अपघात झाला. अपघात झाला तेव्‍हा बस आगार परिसरात शंभरहून अधिक प्रवासी होते; मात्र अपघात झाला तेथे कोणीही नसल्याने अनर्थ टळला. या घटनेमुळे बस देखभालीचा प्रश्‍न पुन्हा ऐरणीवर आला आहे.