पोलिस उपायुक्तांची बदली

भाईंदर, ता. १४ (बातमीदार) : मिरा-भाईंदर, वसई-विरार पोलिस आयुक्त मधुकर पांडे यांची काही दिवसांपूर्वीच बदली झाली होती. त्यापाठोपाठ आता पोलिस उपायुक्त प्रकाश गायकवाड यांचीदेखील बदली करण्यात आली आहे. या दोन्ही बदल्या नुकत्याच झालेल्या मराठी मोर्चाच्या पार्श्वभूमीवरच झाल्याचे मानले जात आहे. शहरामध्ये मंगळवारी (ता. ८) झालेल्या मराठी अस्मितेच्या मोर्चाला पोलिसांनी परवानगी नाकारली होती. त्यावरून मोठा तणाव निर्माण झाला होता. त्याचा परिणाम म्हणून आयुक्त मधुकर पांडे यांची बदली करण्यात आली होती. त्यापाठोपाठ आता परिमंडळ १चे उपायुक्त प्रकाश गायकवाड यांचीदेखील बदली करण्यात आली आहे. गायकवाड यांची नागपूर येथे राज्य गुप्तवार्ता विभागाच्या उपायुक्तपदी नियुक्ती झाली आहे. त्यांच्या जागी राज्य राखीव दलाचे समादेशक म्हणून कार्यरत असलेले राहुल चव्हाण यांची नियुक्ती करण्यात आली आहे. प्रकाश गायकवाड यांची नियमित बदली होणे अपेक्षित होते; मात्र मोर्चानंतर लगेचच ही बदली झाल्याने त्यांच्या बदलीसाठीदेखील मोर्चाच कारणीभूत असल्याची चर्चा आहे.