पडघा, ता. १४ (बातमीदार) : भिवंडी निजामपूर शहर महापालिकेच्या एका अधिकाऱ्याने विद्यार्थ्यांना दप्तरे वाटप करून आपला वाढदिवस साजरा केला. भिवंडी तालुक्यातील दुर्गम भागातील पाच्छापूरजवळील जांबुळपाडा या आदिवासी पाड्यातील विद्यार्थ्यांना पालिकेचे उपायुक्त शैलेश दोंदे यांनी वाढदिवसानिमित्ताने दप्तरे वाटप करून सामाजिक बांधिलकी जपली. विद्यार्थ्यांनी शिक्षण घेऊन आपले भवितव्य घडवले पाहिजे; तसेच ग्रामीण भागात शैक्षणिक चळवळ अधिक गतिमान करण्यासाठी प्रत्येकाने आपल्या परीने जबाबदारी निभावली पाहिजे. आजचे विद्यार्थी या देशाचे उद्याचे भवितव्य आहेत, असे सांगून विद्यार्थ्यांना दोंदे यांनी मार्गदर्शन केले.