घाटकोपर, ता. १५ (बातमीदार)ः केंद्रीय सामाजिक न्याय राज्यमंत्री रामदास आठवले त्यांच्या समाजकारणामुळे नेहमीच चर्चेत असतात. अशातच घाटकोपर येथील एका कार्यक्रमात ‘दलित पँथर’च्या आठवणींना उजाळा देणाऱ्या त्यांच्या कवितेला उपस्थितांनी दाद दिली. पँथरचे सहकारी डी. एम. चव्हाण यांच्या अमृतमहोत्सवी वाढदिवसानिमित्त ते बोलत होते.
घाटकोपर पूर्वेकडील झवेरबेन पोपटलाल हॉलमध्ये रिपब्लिक नेते डी. एम. चव्हाण यांचा ७५ वा अमृतमहोत्सवी वाढदिवस रामदास आठवले यांच्या हस्ते केक कापून साजरा करण्यात आला. या वेळी आठवले यांच्या पत्नी सीमा आठवले तसेच रिपब्लिक नेते गौतम सोनवणे, सिद्धार्थ कासारे, जयंती गडा यांच्यासह इतरही अनेक पक्षाचे पदाधिकारी उपस्थित होते. या वेळी चव्हाण यांच्यावर दादासाहेब यादव, अरुण वाघ, जीवन भालेराव, कुणाल तुरेराव यांनी संपादित केलेल्या एका विशेषांकाचे प्रकाशन करण्यात आले. या वेळी बोलताना आठवले यांनी पँथर काळातील आंदोलने, मोर्चे तसेच सामाजिक प्रश्नावर उभारलेल्या लढ्यांना उजाळा दिला, तर गौतम सोनवणे यांनीही पँथर चळवळ कशी उभी राहिली याबाबतचा आलेख डोळ्यासमोर उभा केला, तर डी. एम. चव्हाण यांनी दलित पँथरची चळवळ टोकाची होती. त्यामुळे अनेकदा सामाजिक अन्यायाविरोधात संघर्ष करावा लागत होता. आज परिस्थिती बदलली असली तरी समाजावरील अन्याय पूर्वीसारखेच दिसतात, असे मत मांडले.