मालाड, ता. १५ (बातमीदार)ः दहिसर स्थानक पश्चिमेकडील फलाट क्रमांक एकच्या मुख्य प्रवेशद्वाराच्या पायऱ्यांजवळ एका जाहिरात फलकामुळे स्थानकाचे नाव झाकून गेले आहे. त्यामुळे पश्चिम रेल्वेच्या अजब कारभाराविरोधात प्रवाशांमध्ये संताप आहे.
वर्दळीच्या स्थानकांपैकी एक असलेल्या दहिसर स्थानक परिसरात जाहिरातबाजीला जोर आला आहे. स्थानक परिसरातच मोठमोठ्या जाहिरात फलकांसाठी लोखंडी खांबांच्या कमानी उभारण्यात आल्या आहेत. त्यामुळे अनेक वर्षांपासून दहिसर स्थानकाच्या छतावरील मराठी, हिंदी आणि इंग्रजी भाषेत लिहिलेले स्थानकाचे नाव झाकले गेले आहे. मुळात प्रवाशांना स्थानकाचे नाव स्पष्टपणे दिसणे अपेक्षित आहे, पण खांबांची उभारणी करताना जाहिरातीमुळे स्थानकाचे नाव झाकले जाणार आहे. याबाबतीत प्रशासनाने तातडीने जाहिरातीचे फलक काढावेत, अशी मागणी महाराष्ट्र रेल्वे प्रवासी महासंघ (प.रे.)चे उपाध्यक्ष राजेश पंडया यांनी पश्चिम रेल्वेचे एमडी आरएम अधिकारी सुनील तिवारी यांच्याकडे केली आहे.