मुरबाड, ता. १५ (वार्ताहर) : सध्या पावसाळ्याचे दिवस चालू आहेत. या दरम्यान साथीच्या आजार पसरले जात आहेत. त्यावर प्रतिबंधक उपाययोजना करण्याची मागणी मनसेने मुरबाड नगरपंचायतीच्या मुख्याधिकाऱ्यांना निवेदनाद्वारे केली आहे. मुरबाड शहरात अनेक ठिकाणी कचऱ्याचे ढीग निर्माण झाले आहेत. पावसाचे पाणी अनेक ठिकाणी भरलेले असून, म्हसा मोरवी येथे भरणाऱ्या मासळी बाजारामुळे दुर्गंधी पसरली आहे. अशा परिस्थितीत डेंगी, इतर साथीचे आजार पसरण्याची दाट शक्यता आहे. त्या‍ अनुषंगाने मनसेचे मुरबाड शहराध्यक्ष देवेंद्र जाधव यांच्या नेतृत्वाखाली मुरबाड नगरपंचायतीचे मुख्याधिकारी यांना निवेदन देण्यात आले. या वेळी त्यांच्यासह तालुका सचिव रूपेश खाटेघरे, उपशराध्यक्ष कीर्ती गोहिल, वार्ड अध्यक्ष १७ नरेश माळी, भरत कराळे, सुजय टेकडे, ऋषिकेश तेलवणे, अध्यक्ष वार्ड क्रमांक १४ व इतर कार्यकर्ते उपस्थित होते.