शिवडी, ता. १५ (बातमीदार)ः पवईतील डॉ. एल. एच. हिरानंदानी हॉस्पिटल आणि रेड हेल्‍थ यांच्या संयुक्त विद्यमाने मध्‍य मुंबईत पहिली ५ जी-सक्षम ॲडवान्‍स्‍ड लाइफ सपोर्ट रुग्णवाहिका सेवा सुरू करण्यात आली आहे.
आपत्कालीन वैद्यकीय प्रतिसाद तंत्रज्ञानामध्ये ५ जी-सक्षम रुग्णवाहिका महत्त्वपूर्ण सेवा आहे. ही रुग्णवाहिका म्हणजे एक प्रकारे चालता फिरता आयसीयू आहे. या रुग्णवाहिकेत अत्याधुनिक संसाधनांचा वापर केला गेला आहे. ज्यामुळे वैद्यकीय माहिती पोहोचवणे आणि आपत्कालीन प्रतिसाद पथके तसेच रुग्णालय सुविधांमध्‍ये समन्‍वय साधणे शक्‍य होते. मध्य मुंबईत अशी रुग्णवाहिका सेवा सुरू झाल्याने जलद, कार्यक्षम आपत्कालीन काळात रुग्णसेवा पुरवणे अधिक सोपे होणार आहे. तसेच रस्ते अपघातांवेळी ही सुविधा उपयुक्त ठरणार आहे. या सेवेचे पोलिस उपायुक्‍त, मुंबई वाहतूक पूर्व विभाग प्रदीप चव्हाण यांच्या हस्ते नुकतेच उद्‍घाटन करण्यात आले. या वेळी रेड हेल्‍थचे संस्‍थापक व मुख्‍य कार्यकारी अधिकारी प्रभदीप सिंग, डॉ. एल. एच. हिरानंदानी हॉस्पिटलचे मुख्‍य कार्यकारी अधिकारी डॉ. समीर कुलकर्णी उपस्थित होते.