मिलिंद तांबे ः सकाळ वृत्तसेवा
मुंबई, ता. १५ : महाराष्ट्राच्या अस्मितेचे रक्षण आणि मराठी भाषेच्या मुद्द्यावर ठाकरे बंधू एकत्र येण्याच्या हालचालींना वेग आला आहे. या भूमिकेला मराठी मुस्लिम सेवा संघाने जाहीर पाठिंबा जाहीर केला असून, सर्वसमावेशक भूमिका घेऊन राजधर्म पाळण्याची अपेक्षा व्यक्त केली आहे.
मुंबईत मुस्लिम मतदारांची संख्या अंदाजे १५-१८ लाख इतकी आहे. लोकसभा निवडणुकीत महाविकास आघाडीला १० ते १२ लाख मते, म्हणजेच सुमारे ६५ ते ७५ टक्के मुस्लिम मते मिळाली होती. विधानसभा निवडणुकीत याच मतांच्या जोरावर मविआचे उमेदवार निवडणूक जिंकले. उद्धव ठाकरे यांनी मुस्लिमांना सोबत घेऊन निवडणुकीला सामोरे जाण्याची रणनीती आखली होती, मात्र राज ठाकरे यांची त्यांच्या विरोधात भूमिका होती. मनसेच्या स्थापनेनंतर सुरुवातीच्या काळात मुस्लिम समाजाविरोधातील काही आक्रमक विधाने, मशिदींवरील भोंग्यांपासून ते पाकिस्तानविरोधी टीका करणाऱ्या आक्रमक भाषणांतून त्यांनी टीकेची झोड उठवली होती. त्यामुळे मुस्लिम समाज काहीसे अंतरच ठेवून होता, पण आता ठाकरे बंधू एकत्र येणार असल्याने मराठी मुस्लिम सेवा संघाचे सरचिटणीस कॅप्टन अकबर महंमद खलफे यांनी पत्र पाठवून अभिनंदन केले आहे.
-------------------------------------------------
राजकीय वर्तुळात या पाठिंब्याला महत्त्व आहे. एकीकडे ठाकरे बंधूंची समीकरणे बदलत असताना, मराठी मुस्लिम समाजाचा जाहीर पाठिंबा आगामी पालिका निवडणुकीच्या पार्श्वभूमीवर निर्णायक घडामोड ठरू शकते. कदाचित मुस्लिम समाजाला ही चांगला पर्याय वाटत आहे.
- प्रताप आसबे, राजकीय विश्लेषक
.......
भाजपकडून सातत्याने होणाऱ्या धार्मिक ध्रुवीकरणाच्या राजकारणाला मुस्लिम समाज कंटाळला आहे. तो नवीन पर्याय शोधत आहे. जर ठाकरे बंधूंनी आपल्या भूमिकेत वास्तविक बदल दाखवला, संवाद साधला, तर मुस्लिम समाजाची मते दोघांनाही मिळू शकतात.
- हेमंत देसाई, राजकीय विश्लेषक
........
मराठीपणावर प्रेम करणाऱ्या प्रत्येकासोबत आम्ही आहोत. धर्म महत्त्वाचा नाही, मातीतली नाळ महत्त्वाची आहे. ठाकरे बंधू सर्वधर्म समभावाची भूमिका घेऊन पुढे येतील, अशी अपेक्षा आहे.
- कॅप्टन अकबर महंमद खलफे, सरचिटणीस, मराठी मुस्लिम सेवा संघ
.......
मुस्लिम मतदारांचे प्रमाण
शहर टक्क्यांमध्ये
भायखळा - ४०
बांद्रा (पश्चिम व पूर्व) - ३८
कुर्ला - ४२
मालाड (पश्चिम) - ३०
धारावी - ३०
मानखुर्द-शिवाजीनगर - ६८
चांदिवली - ३०
मुंबादेवी - ३३