मुंबई, ता. १५ ः भोईवाडा पोलिस ठाण्यातील एका पोलिस शिपायाने बनावट स्वाक्षरीतून सहकाऱ्याची तब्बल १६ लाखांची फसवणूक केली आहे. या प्रकरणी गुन्हा नोंदवण्यात आला असून, दोघेही नायगाव मुख्यालय येथील सशस्त्र विभागात कार्यरत आहेत.
भोईवाडा पोलिसांनी दिलेल्या माहितीनुसार, गुन्हे शाखेत प्रतिनियुक्तीवर असलेले दिलीप राठोड २० वर्षे भारतीय सैन्य दलाची सेवा बजावल्यानंतर २०१६ मध्ये मुंबई पोलिस दलात भरती झाले आहेत. सध्या त्यांची नियुक्ती सशस्त्र विभागात आहे. पोलिस दलात भरती झाल्यानंतर अकोले येथील प्रशिक्षण केंद्रात राठोड यांची ओळख सुनील पाटील यांच्याशी झाली. पाटीलसुद्धा सैन्य दलातून निवृत्ती घेऊन पोलिस दलात भरती झाले होते. २०१८ मध्ये पाटील यांनी मुंबई पोलिसांच्या पतसंस्थेतून १२ लाखांचे कर्ज काढले. या व्यवहारात तक्रारदार राठोड जामीन होते. दोन वर्षांनी पाटील यांनी पुन्हा या पतसंस्थेतून १६ लाखांचे कर्ज घेतले. हा व्यवहार राठोड यांना माहीत नव्हता. दरम्यान, एप्रिल २०२१ मध्ये राठोड यांना पतसंस्थेची नोटीस आली. पाटील यांनी घेतलेल्या १६ लाखांच्या कर्ज व्यवहारास आपण जामीन होता. पाटील कर्ज फेडत नसल्याने ही रक्कम आपण फोडावी, असे त्यात नमूद होते. राठोड यांनी पतसंस्थेत जाऊन चौकशी केली असता जामीनदाराच्या अर्जावर त्यांची बनावट स्वाक्षरी आढळली.
-------------------------------
कर्ज फेडण्याचा वायदा
पोलिस तक्रार करेन, असे सांगताच पाटील यांनी फेब्रुवारी २५ पर्यंत कर्ज फेडेन, अशी हमी दिली होती. दरम्यान, मुदतीत कर्जाची परतफेड केली नसल्याने राठोड यांनी भोईवाडा पोलिस ठाण्यात तक्रार दिल्यानंतर भारतीय दंड संहितेतील फसवणूक, बनावट कागदपत्रे तयार केल्याचा गुन्हा नोंदवला आहे.