भाईंदर, ता. १५ (बातमीदार) : मिरा-भाईंदर महापालिका करीत असलेली कचरा डब्यांची खरेदी वादाच्या भोवऱ्यात सापडली आहे. महापालिका शहरातील गृहसंकुलांना हे डबे पुरवणार असून, एका डब्याची किंमत ६६ हजार ते १० लाख रुपये एवढी असून, त्यावर तब्बल १९ कोटी खर्च केले जाणार आहेत. महापालिकेची आर्थिक स्थिती नाजूक असताना कचऱ्याच्या डब्यांवर एवढा निधी का खर्च केला जात आहे, असा प्रश्न उपस्थित केला जात आहे.

दररोज गोळा होणार कचरा संकलित करून ठेवण्यासाठी मिरा-भाईंदर महापालिकेकडून गृहसंकुलांना कचऱ्याचे डबे पुरविण्यात येणार आहेत. हे डबे वेगवेगळ्या प्रकारचे आहेत. त्यात स्टेनलेस स्टील पावडर कोटेड, सौर पॅनेल असलेले स्वयंचलित आणि फायबरच्या डब्यांचा समावेश आहेत. सुमारे चार हजार डबे खरेदी केले जाणार आहेत. त्यातील स्टेनलेस स्टील व फायबर डब्याच्या एका नगाची किंमत अनुक्रमे सुमारे ६६ हजार व ३५ हजार, तर सौरऊर्जेवरील एका डब्याची किंमत सुमारे १० लाख एवढी आहे. एका डब्याची क्षमता ३०० लिटर एवढी आहे. सौरऊर्जेवरील कचऱ्याचा डबा भरल्यानंतर त्याचा आपोआप संदेश मिळण्याची सुविधा आहे. सौरऊर्जेवरील २१ डबेच खरेदी केले जाणार असून, ते केवळ मोठ्या गृहसंकुलांना दिले जाणार आहेत. यासाठी सुमारे १९ कोटींचा खर्च अपेक्षित असून, आयुक्त राधाबिनोद शर्मा यांनी या प्रस्तावाला नुकतीच मान्यता दिली आहे. गृहसंकुलांना या डब्यातच कचरा गोळा करून ठेवणे बंधनकारक असणार आहे.

डबे खरेदी करण्यासाठी शासकीय दर नसल्याने खुल्या बाजारातून दर मागविण्यात आले. त्यानंतर या दरानुसार डबे खरेदीची ई-निविदा काढण्यात आली. ठाणे महापालिकेनेदेखील याच दराने डबे खरेदी केली असल्याचे प्रशासनाचे म्हणणे आहे, मात्र महापालिकेची आर्थिक स्थिती अत्यंत नाजूक असताना व अनेक विकासकामांसाठी निधीची कमतरता भासत असताना कचऱ्याच्या डब्यांवर एवढा खर्च कशासाठी, असा प्रश्न उपस्थित होत आहे.

डबे खरेदीसाठी ई-निविदा प्रक्रिया पारदर्शक पद्धतीने राबवली आहे. त्यात कमीत कमी दराची निविदा मंजूर करण्यात आली आहे. कंत्राटदाराला अद्याप कार्यादेश देण्यात आलेला नाही. डबे खरेदीचे दर जास्त असल्याच्या तक्रारी आल्या असल्याने तृतीय पक्षाकडून पडताळणी केली जाईल.
- राधाबिनोद शर्मा, आयुक्त, मिरा-भाईंदर महापालिका