कासा, ता. १५ (बातमीदार) : आंबेसरी येथील खासगी कंपनीच्या प्रकल्पाच्या ठिकाणी काम सुरू असताना काही चोरट्यांनी उघड्यावर पडलेल्या सुमारे चार लाखांच्या तांबे, तसेच ॲल्युमिनियमच्या तारा चोरल्या होत्या. याप्रकरणी पाच संशयित आरोपींना डहाणू पोलिसांनी अटक केली आहे.

आंबेसरी येथे अनेक दिवसांपासून एल ॲण्ड टी कंपनीच्या प्रकल्पाचे काम सुरू आहे. ६ जुलै रोजी रात्रीच्या सुमारास काही चोरट्यांनी मोटारसायकलवर येऊन उघड्यावर ठेवलेली १५० मीटर लांबीची तीन लाखांची ॲल्युमिनियम केबल, तसेच तांब्याची केबल असे एकूण तीन लाख ९२ हजार ५०० रुपयांची चोरी करून पलायन केले. यानंतर पुन्हा १३ जुलै रोजी त्याच आरोपींनी पुन्हा चोरीचा प्रयत्न केले असता कंपनीच्या काही कामगारांनी आरडाओरड केल्याने चोरट्यांनी मोटारसायकल सोडून पलायन केले. याबाबतीत डहाणू पोलिस ठाण्यात १४ जुलै रोजी गुन्हा दाखल करण्यात आला होता. पोलिसांनी घटनास्थळी सापडलेल्या मोटारसायकलच्या मदतीने पाच संशयितांना शोधून अटक केली आहे. पुढील तपास डहाणूचे पोलिस उपनिरीक्षक के. ए. गायकवाड करीत आहेत.