‘बेस्ट’च्या सुविधेला दुर्घटनांचे ग्रहण
आग, ब्रेकडाऊन होण्याच्या प्रमाणात वाढ
सकाळ वृत्तसेवा
मुंबई, ता. १६ ः बेस्ट उपक्रमाच्या स्वमालकीच्या बस कमी झाल्याने नव्या कंत्राटी बस मोठ्या प्रमाणात आल्या आहेत; पण या बस ब्रेकडाऊन तसेच त्यांना आगी लागण्याचे प्रमाणही वाढल्याने बेस्टच्या सेवेला दुर्घटनांचे ग्रहण लागले आहे.
बेस्ट उपक्रमात २०१९ भाडेतत्त्वावरील बस मोठ्या प्रमाणात घेण्यास सुरुवात झाली. गेल्या काही वर्षांपासून भाडेतत्त्वावरील बसना आग लागण्याच्या घटना वाढू लागल्या आहेत. तसेच या गाड्यांमध्ये ब्रेकडाऊनचे प्रमाण वाढले आहे. त्याचा प्रवाशांना नाहक त्रास होत आहे. बस वेळेवर येत नसल्याने प्रवाशांच्या तक्रारी आहेत. अशातच फोर्ट परिसरात सिद्धार्थ महाविद्यालयाच्या सिग्नलजवळ एका बसला आग लागली. त्यातील प्रवासी सुखरूप आहेत; मात्र भाडेतत्त्वावर आलेल्या कंत्राटी बसना आग लागल्याने प्रवाशांच्या सुरक्षेचा प्रश्न निर्माण झाला आहे.
-------------------
प्रवासी संख्येवर परिणाम
गाड्या ब्रेकडाऊन होत असल्याने रस्त्यावरील फेऱ्यांची संख्या कमी झाली आहे. त्यामुळे त्याचा नाहक त्रास सहन करावा लागत आहे. प्रत्येक बसथांब्यावर बसची प्रतीक्षा करणाऱ्या प्रवाशांची संख्या कमी झाली आहे. बस रस्त्यात बंद पडत आहेत. तसेच बसची विद्युत बॅटरी पेट घेत असल्याने प्रवाशांच्या सुरक्षिततेचा प्रश्न निर्माण झाला आहे.
----------------
आगीच्या घटना
जानेवारी आणि फेब्रवारी २०२३ मध्ये तीन बसना आग लागली होती. यात अंधेरी स्थानकाजवळ गर्दीच्या वेळी बस पेटल्याची घटना २२ फेब्रुवारी २०२३ रोजी घडली होती. तर चर्चगेट स्थानकाजवळ १८ एप्रिल २०२५, जेव्हीएलआरच्या गांधीनगर जंक्शनजवळ ३० सप्टेंबर २०२३, ओशिवरा बस आगारात १७ जानेवारी २०२५ अशा आगीच्या घटनांची नोंद आहे.
----------------
बेस्टच्या कंत्राटी बसची देखभाल आणि दुरुस्ती करीत नाहीत. त्यामुळे या बसला आगी लागण्याचा घटना घडत आहेत. बेस्टची प्रतिमा डागाळत आहे. ही प्रतिमा सुधारण्यासाठी स्वःमालकीच्या बस उपक्रमाने खरेदी कराव्यात.
- शशांक राव, बेस्ट वर्कर्स युनियन
---------------