ठाण्यात शाळकरी मुलींचे विनयभंग
वर्तकनगर पोलिसांकडून एक जण ताब्यात
सकाळ वृत्तसेवा
ठाणे, ता. १५ : एकाच दिवशी तीन शाळकरी मुलींचा विनयभंग झाल्याचा धक्कादायक प्रकार ठाण्याच्या वर्तकनगर परिसरात उघडकीस आला आहे. याप्रकरणी वर्तकनगर पोलिसांनी गुन्हा दाखल करून एकाला ताब्यात घेतले आहे. पीडित विद्यार्थिनी या १६ ते १७ वयोगटातील असल्याची माहिती पोलिसांनी दिली.
वर्तकनगर परिसरात असलेल्या एका शाळेत सोमवारी (ता. १४) सकाळी ७.३० वाजण्याच्या सुमारास जाताना एका विद्यार्थिनीचा अज्ञात ३० ते ३५ वयोगटातील व्यक्तीने विनयभंग केला. त्याबाबत घरी आल्यानंतर पीडित मुलीने तिच्या पालकांना माहिती दिली. मुलीचे पालक सोमवारी दुपारी वर्तकनगर पोलिस ठाण्यात तक्रार देण्यासाठी गेले होते. त्याच सुमारास आणखी दोन विद्यार्थिनी अशाच प्रकारे विनयभंग झाल्याची तक्रार देण्यासाठी वर्तकनगर पोलिस ठाण्यात गेल्या.
याप्रकरणी वर्तकनगर पोलिस ठाण्यात गुन्हा दाखल झाला आहे. पोलिसांनी एकाला ताब्यात घेतल्याची माहिती वरिष्ठ पोलिस निरीक्षक राजकुमार वाघचौरे यांनी दिली. पोलिसांनी ताब्यात घेतलेल्या तरुणाचे नाव समजू शकले नाही. पुढील तपास वर्तकनगर पोलिस करीत आहेत.