रायगडमध्ये कोसळ‘धार’
कुंडलिका, सावित्री धोक्याच्या पातळीवर
अलिबाग, ता. १५ (वार्ताहर) ः मागील काही दिवस विश्रांती घेतलेल्या पावसाने मंगळवारी रायगड जिल्ह्यात जोरदार हजेरी लावली. मुंबई, ठाणे, पालघरमध्येही पावसाचा जोर होता. त्यामुळे अनेक ठिकाणी सखल भागात पाणी साचले होते. रायगडमध्ये सोमवारी रात्रीपासून सुरू झालेल्या मुसळधार पावसामुळे जनजीवन विस्कळित झाले. जिल्ह्यातील कुंडलिका, अंबा, सावित्री या नद्यांनी धोक्याची पातळी ओलांडली आहे. तसेच कशेडी घाटात दरड कोसळली आहे.
मुसळधार पावसामुळे अलिबाग शहरातील कामगार नाका परिसरासह बसस्थानकात पाणी साचले आहे. त्यामुळे प्रवाशांचे प्रचंड हाल झाले आहेत. तळा रस्त्यावरील पुलावरून पाणी आल्याने वाहतूक बंद झाली. सावित्री नदीने धोक्याची पातळी ओलांडल्याने महाड शहरात पाणी शिरले. विन्हेरेतील नागेश्वरी नदीपात्र तुडुंब भरले असून, गावातील मल्लिकार्जुन मंदिराजवळील पुलावरून पाणी गेल्याने वाहतूक विस्कळित झाली. महाड शहरामधील रायगडकडे जाणाऱ्या दस्तुरी मार्गावर पाणी आल्याने हा मार्ग बंद झाला. मुसळधार पावसाने वरसे-भुवनेश्वर या परिसरातील काही घरांमध्ये पाणी शिरल्याचा घटना घडली आहे. महादेव खार येथे रस्त्यावर दरड आल्याने वाहतूक पूर्णपणे बंद करण्यात आली. आंबेवाडी नाका, कोलाड नाक्यावर दुकानात पाणी शिरले. नागोठणे बसस्थानकातही पुराचे पाणी शिरले होते.
----
आंबेनळी घाटात वाहतूक बंद
पोलादपुरातील आंबेनळी घाटामध्ये बऱ्याच ठिकाणी माती व दगड रस्त्यावर आले आहेत. यामुळे वाहतूक तात्पुरती बंद करण्यात आली. भोराव-सवाद-धारवली या मुख्य रस्त्यावर पाण्याचा मोठा प्रवाह आल्याने माटवण, सवाद, धारवली या गावांचा संपर्क तुटला आहे. ओंबळी गावामध्ये काही घरांजवळ माती घसरली आहे.
----
शाळांना सुट्टी
जिल्ह्यात सुरू असलेल्या मुसळधार पावसाच्या पार्श्वभूमीवर मंगळवारी (ता. १५) माणगाव, तळा, रोहा, पाली, महाड, पोलादपूर या तालुक्यांतील शाळांना सुट्टी जाहीर करण्यात आली होती. दरम्यान, हा आदेश उशिरा पोहोचल्याने विद्यार्थ्यांना शाळेत जाऊन परतावे लागले.