दंडात्मक कारवाईवेळी वाहतूक पोलिसांना मारहाण
तुळिंज पोलिस ठाण्यात बाप-लेकावर गुन्हा दाखल
नालासोपारा, ता. १५ (बातमीदार) : दुचाकीवरून जाताना एका मुलाकडे गाडीचे लायसन्स नसल्याने दंडात्मक कारवाई केली. या रागातून बाप-लेकाने दोन वाहतूक पोलिसांना नालासोपाऱ्यात लाथाबुक्क्यांनी मारहाण केली. या घटनेचा सर्व प्रकार मोबाईल कॅमेऱ्यात कैद झाला असून, हा व्हिडिओ समाजमाध्यमांवर व्हायरल झाल्यानंतर मारहाण करणाऱ्या बाप-लेक आणि एक अन्य व्यक्ती अशा तिघांविरोधात नालासोपारा पूर्व तुळिंज पोलिस ठाण्यात गुन्हा दाखल करून त्यांना अटक केली आहे. नालासोपारा पूर्व नागीनदास पाडा येथील सीतारा बेकारीजवळ मंगळवारी (ता. १५) सकाळी १० वाजता ही घटना घडली. पोलिसांवर सार्वजनिक ठिकाणी खाली पाडून मारहाण झाल्याने सर्वत्र संताप व्यक्त होत आहे.
मंगेश नारकर आणि पार्थ नारकर असे मारहाण करणाऱ्या बाप-लेकाची नावे असून, ते नालासोपारा येथे राहतात. तर पोलिस हवालदार हनुमंत सांगळे आणि शेषनारायण आठरे असे मारहाण झालेल्या वाहतूक पोलिसांची नाव आहेत. नालासोपारा पूर्व नागीनदास पाडा येथे हे दोन कर्मचारी आपले कर्तव्य बजावत असताना पार्थ हा मुलगा आपल्या बाइकवरून जात असताना त्याला पोलिसांनी लायसन्स विचारले. या वेळी पोलिसांना त्याच्याकडे लायसन्स आढळून आले नाही. दरम्यान, मुलाने आपल्या बापाला बोलावून घेतले. त्यानंतर पोलिस आणि बाप-लेकात वादविवाद झाला. यात बाप-लेकाने पोलिसांना खाली पाडून लाथाबुक्क्यांनी मारहाण केली. हा व्हिडिओ समाजमाध्यमांवर व्हायरल झाला आहे. याबाबत तुळिंज पोलिसांनी दोघा बाप-लेकाविरोधात शासकीय कामात अडथळा निर्माण केल्याप्रकरणी गुन्हा दाखल केला. त्यांना बुधवारी (ता. १६) न्यायालयात हजर करणार असल्याची माहिती पोलिसांनी दिली.