सीवूड्समध्ये अल्पवयीन मुलीची आत्महत्या
नवी मुंबई, ता. १५ (वार्ताहर) : सीवूड्स भागात राहणाऱ्या एका १६ वर्षीय अल्पवयीन मुलीने शेजारील १० मजली इमारतीवरून उडी मारून आत्महत्या केल्याचे उघडकीस आले आहे. मुलीच्या आत्महत्येमागचे कारण अद्याप स्पष्ट झाले नसल्याचे पोलिसांनी सांगितले.
या घटनेतील मृत मुलगी सीवूड्स भागात राहण्यास होती तसेच ती अकरावीत शिक्षण घेत होती. रविवारी (ता. १३) दुपारी ही मुलगी अचानक घरातून निघून गेली होती. त्यानंतर मुलीच्या कुटुंबीयांनी तिचा सर्वत्र शोध घेतला; मात्र ती न सापडल्याने त्यांनी एनआरआय पोलिस ठाण्यात तक्रार दाखल केली होती. या तक्रारीवरून पोलिसांनी अपहरणाचा गुन्हा दाखल करून या मुलीचा शोध सुरू केला होता. याचदरम्यान सोमवारी (ता. १४) सकाळी या मुलीचा मृतदेह ती राहत असलेल्या परिसरातील १० मजली इमारतीच्या खाली सापडला. प्राथमिक तपासावरून या मुलीने त्या इमारतीच्या टेरेसवरून उडी मारून आत्महत्या केली असावी, असा अंदाज व्यक्त करण्यात येत आहे. त्यानुसार एनआरआय पोलिसांनी अपमृत्यूची नोंद करून पुढील तपासाला सुरुवात केली आहे.