डेंगीच्या अळ्या सापडल्याने २५ हजारांचा दंड
कल्याण, ता. १५ (वार्ताहर) : महापालिका क्षेत्रात डेंगीची साथ पसरली असून, यात एका तरुणाला जीवदेखील गमवावा लागला आहे. यानंतर खडबडून जागे झालेल्या प्रशासनाने डेंगीची साथ रोखण्यासाठी कंबर कसली आहे. अतिरिक्त आयुक्त हे विविध प्रभागात जाऊन पाहणी करत आहेत. या पाहणीत बेतूरकर पाडा येथील डेंगीमुळे मृत्यू झालेल्या तरुणाच्या घराच्या परिसरात बांधकाम ठिकाणी डेंगी डासाच्या अळ्या सापडल्याने २५ हजारांचा दंड आकारण्यात आला आहे.

सततच्या पर्जन्यवृष्टीमुळे उद्भवणाऱ्या साथरोगाच्या पार्श्वभूमीवर अतिरिक्त आयुक्त हर्षल गायकवाड यांनी सोमवारी (ता. १४) अ प्रभाग क्षेत्रातील साफसफाईची पाहणी केली होती. त्यानंतर मंगळवारी (ता. १५) अतिरिक्त आयुक्त हर्षल गायकवाड यांनी क प्रभाग क्षेत्रातील गजानन महाराज मंदिर परिसर, साईबाबा नगर, प्रभाग क्र.२९ मधील गुलमोहर सोसायटी, सद्गगुरु कृपा कॉलनी, श्री कृष्ण कॉलनी, प्रभाग क्र.२८ मधील शकुंतला भवन, खंडेलवाल कॉलनी, क्वालिटी कंपाउंड व गावदेवी मंदिर परिसरात समक्ष भेट दिली. या वेळी सुमारे २०० कंटेनरची पाहणी केली. या वेळी ३० कंटेनरमध्ये डासांच्या अळ्या आढळून आल्या.

अतिरिक्त आयुक्त हर्षल गायकवाड यांनी संबंधित परिसरातील नागरिकांना पाण्याचा जास्त काळ साठा केल्यामुळे उद्भवणाऱ्या साथरोगांबाबत मार्गदर्शन केले. रोकडे कॉलनी आणि पंचमुखी मारुती मंदिर परिसरातील तीन बांधकामांच्या ठिकाणी डेंगीच्या डास अळ्या सापडल्याने महापालिकेने २५ हजारांचा दंड आकारला आहे.