मुरबाडमध्ये महिलांसाठी २३ सरपंचपदे राखीव
मुरबाड, ता. १६ (बातमीदार) : तालुक्यातील १२६ ग्रामपंचायतींच्या सरपंचपदाची आरक्षण सोडत मंगळवारी (ता. १५) तहसीलदार अभिजित देशमुख यांच्या अध्यक्षतेखाली मुरबाड येथील सामायिक सुविधा केंद्रात काढण्यात आली. १२६ पैकी बिगर अनुसूचित क्षेत्रातील ७१ ग्रामपंचायती आहेत. या ग्रामपंचायतींसाठी २०२५ ते २०३० या पंचवार्षिक कालावधीसाठी होणाऱ्या निवडणुकीसाठी आरक्षण काढण्यात आले आहे. यात अनुसूचित जाती दोन, अनुसूचित जमाती चार, नागरिकांचा मागास प्रवर्ग १९ व खुला प्रवर्गासाठी ४६ सरपंचपदे आरक्षित झाली आहेत. (पेसा) अनुसूचित क्षेत्रातील ५५ ग्रामपंचायतींपैकी २८ ग्रामपंचायतीची सरपंचपदे महिलांसाठी राखीव ठेवली आहेत, तर २७ सरपंचपदे सर्वसाधारण आहेत.

अनुसूचित क्षेत्रात महिला सरपंचपदासाठी आरक्षित झालेल्या २८ ग्रामपंचायतींची नावे आंबेळे खुर्द, इंदे, उंबरोली खुर्द, उमरोली बु, एकलहरे, ओजीवले, किसळ, खापरी, खेडले, खोपिवली, तळेगाव, धसई, न्याहडी, पऱ्हे, पळू, फांगलोशी, बळेगाव, भोराडे महाज, माळ, मिल्हे, मेरडी, रामपूर, वडवली, संगम, सिंगापूर, मानीवली खुर्द, खेवारे उर्वरित २७ ग्रामपंचायतींची सरपंचपदे खुल्या प्रवर्गासाठी आहेत. बिगर अनुसूचित क्षेत्रातील ७१ ग्रामपंचायतींत सरपंचपदासाठी महिला राखीव अनुसूचित जाती प्रवर्गासाठी दोन जागा न्हावे, देवगाव (महिला), अनुसूचित जमाती प्रवर्ग चार जागा साकुर्ली, पोटगाव व महिलांसाठी राखीव कळंबे व शिरगाव, नागरिकांचा मागास प्रवर्गासाठी १९ जागा राखीव आहेत. त्यापैकी १० जागा महिलांसाठी तर नऊ जागा नागरिकांचा मागास प्रवर्गातील पुरुष किंवा महिलांसाठी राखीव आहेत. सर्वसाधारण प्रवर्गातील एकूण ४६ ग्रामपंचायतींपैकी २३ सरपंचपदे महिलांसाठी राखीव आहेत, तर २३ सरपंचपदी महिला अथवा पुरुष अशी कोणाचीही निवड करता येईल.