रोहा बसस्थानकाच्या प्रवेशद्वाराला तलावाचे स्वरूप
पावसाचे पाणी अंगावर उडत असल्‍याने प्रवाशांची गैरसोय
रोहा, ता. १६ (बातमीदार) ः रोहा बसस्थानकाच्या प्रवेशद्वाराला खड्ड्यांमुळे तलावाचे स्वरूप आले आहे. पावसाचे पाणी अंगावर उडत असल्‍याने प्रवाशांची गैरसोय होत असल्याने नाराजी व्‍यक्‍त केली जात आहे.
बांधा, वापरा आणि हस्‍तांतर करा, या तत्त्वावर एसटी महामंडळाने रोहा बसस्थानकाच्या आवारात करोडो रुपये खर्च करून नवीन वास्तू उभी केली आहे. विशेष म्‍हणजे उत्पनाचे साधन म्हणून दर्शनी भागात व्यावसायिक गाळेसुद्धा बांधले. या माध्यमातून रोज लाखो रुपयांची उलाढाल होत आहे, असे असताना स्थानकाला आता असंख्य समस्यांचे ग्रहण लागले आहे. स्थानकात मोठ्या प्रमाणात खड्डे पडले असून, त्‍यातून गाड्यांसह प्रवाशांना ये-जा करावी लागत आहे. पावसामुळे खड्ड्यांमध्ये पाणी साचले असून, प्रवाशांच्या अंगावर उडत असल्याने नाराजी व्‍यक्‍त केली जात आहे. या खड्ड्यांमुळे बसस्थानकाच्या प्रवेशद्वारासमोर अक्षरशः तलावाचे स्वरूप आले आहे. रोहे शहराच्या विकासासाठी खासदार सुनील तटकरे यांनी करोडो रुपयांचा निधी आणला. यातून एसटी महामंडळाच्या जागेत अलिशान बसस्थानक बांधण्यात आले आहे, मात्र देखभाल दुरुस्तीअभावी या स्थानकाच्या आवारातील अनेक समस्या अद्याप जैसे थे अवस्थेत आहेत. विशेष म्हणजे या स्थानकात दोन्ही बाजूने असलेल्या प्रवेशद्वारासमोर मोठमोठे खड्डे पडले आहेत. या कंबरतोड खड्ड्यातून रोज शेकडो गाड्या आणि प्रवासी ये-जा करत असतात. कंबरतोड खड्ड्यांची समस्या गंभीर असताना संबंधित विभागातील एकही अधिकारी खड्डेमुक्त प्रवेशद्वारासाठी प्रयत्नशील असल्याचे दिसून येत नाही. वरिष्ठ मंडळींच्या दिमतीला धावणाऱ्या अधिकारीवर्गाने कधीतरी गांभीर्यांने या खड्ड्यांच्या समस्यातून रोहेकर नागरिकांना मुक्त करावे, अशी मागणी रोहे-अष्टमीकर नागरिकांकडून करण्यात येत आहे.
.....................
कोट
प्रवेशद्वारासमोर प्रचंड खड्डे आहेत. ही समस्या फार गंभीर असून, हे खड्डे बुजविण्यासाठी विभागीय कार्यालयातील अधिकारीवर्गाने सांगितले आहे. संबंधित ठेकेदार लवकरच या खड्ड्यांची मलमपट्टी करतील.
-अजिंक्‍य रोहेकर, अधीक्षक, रोहा आगार