खारघर, ता. १६ (बातमीदार) : खारघर परिसरात काही महिन्यांपासून कमी दाबाने पाणीपुरवठा होत आहे. त्‍यामुळे भरपावसात टँकरच्या पाण्यावर तहान भागवण्याची वेळ नागरिकांवर आली आहे. याबाबत वारंवार तक्रार करूनही प्रशासनाकडून दखल घेतली जात नसल्‍याने खारघरमधील जवळपास ८० सोसायटींच्या महिलांनी बुधवारी (ता. १६) सिडकोच्या पाणीपुरवठा कार्यालयावर हंडा मोर्चा काढला होता. पाणीप्रश्न सुटल्याशिवाय माघार नाही, अशी भूमिका घेत महिलांनी जोरदार घोषणाबाजी केली. अखेर सिडकोच्या अधिकाऱ्यांनी शनिवारपासून पाणीपुरवठा सुरळीत होईल, असे लेखी आश्‍वासन दिल्यानंतर आंदोलन स्‍थगित करण्यात आले. मोर्चाचे नेतृत्व भाजपचे पदाधिकारी अमर उपाध्याय यांनी केले.
खारघर सेक्टर तीन, चार, पाच, सहा आणि सेक्टर सातमध्ये अनेक दिवसांपासून पाणीटंचाई भेडसावत आहे. त्‍यामुळे संतप्त महिलांनी सिडकोच्या खारघरमधील कार्यालयावर हंडा मोर्चा काढला होता. या वेळी महिलांनी एका हातात हंडा आणि दुसऱ्या हातात सिडको प्रशासनाचा निषेध नोंदवणारे फलक झळकावले. पाणीप्रश्न सुटल्याशिवाय माघार घेणार नसल्‍याची भूमिका महिलांनी घेतल्‍यामुळे आणि वातावरणात तणाव निर्माण होऊ नये, यासाठी पोलिसांना पाचारण करण्यात आले.

सिडकोच्या आवारात धुतले कपडे
काही महिलांनी सिडको कार्यालयाच्या आवारात बादलीत पाणी आणून कपडे धुवून सिडकोचा निषेध केला. यासंदर्भात भाजपचे पदाधिकारी अमर उपाध्याय यांच्याकडे विचारणा केली असता सिडकोने शनिवारपासून पाणीपुरवठा सुरळीत होतील, असे लेखी लिहून दिल्यामुळे महिलांनी मोर्चा स्‍थगित केल्‍याचे सांगितले.