पालघर, ता. १६ (बातमीदार) : जिल्हा परिषदअंतर्गत राबवण्यात येणाऱ्या ‘निपुण पालघर-गुणवत्ता विकास अभियान’ या विशेष उपक्रमाचा मंगळवारी (ता. १५) पालघरजवळील वेवूर येथील जिल्हा परिषद शाळेत सुरुवात करण्यात आली. या अभियानाचा उद्देश दुसरी ते आठवीच्या विद्यार्थ्यांमध्ये पायाभूत साक्षरता आणि संख्याज्ञान कौशल्ये दृढ करणे हा आहे.

मुख्य कार्यकारी अधिकारी मनोज रानडे हे या कार्यक्रमाला प्रमुख पाहुणे म्हणून उपस्थित होते. त्यांच्या हस्ते ‘विनोबा अ‍ॅप’चे उद्‍घाटन करण्यात आले. या वेळी प्राथमिक शिक्षणाधिकारी सोनाली मातेकर, गटविकास अधिकारी बापूराव नाळे, डाएटचे प्राचार्य संभाजी भोजने, जिल्हा समन्वयक डाएट तानाजी डावरे, गटशिक्षणाधिकारी माधवी तांडेल, शाळेचे शिक्षकवृंद, पालक व विद्यार्थी उपस्थित होते.

कार्यक्रमादरम्यान विद्यार्थ्यांच्या अध्ययन क्षमतांची पडताळणी करण्यात आली. ही संपूर्ण प्रक्रिया ‘विनोबा अ‍ॅप’द्वारे ऑनलाइन नोंदवली जात असून, गुणवत्तेचे विश्लेषण शाळा, केंद्र व तालुका पातळीवर करता येणार आहे. या वेळी रानडे यांनी दुसरीच्या विद्यार्थिनीची मूल्यांकन प्रक्रिया स्वतः उपस्थित राहून पाहिली आणि शिक्षकांना १०० टक्के गुणवत्तेच्या दिशेने विशेष प्रयत्न करण्याचे आवाहन केले. विद्यार्थ्यांमध्ये केवळ वाचनच नव्हे तर अर्थ समजणे, वाक्यरचना करणे, विचारशक्ती वाढवणे आणि जीवनोपयोगी कौशल्यांचा विकास करणे गरजेचे आहे, असे प्रतिपादन त्यांनी केले. शिक्षकांनी विद्यार्थ्यांची तयारी नियोजनबद्ध आणि गंभीरपणे करावी, असे आवाहनदेखील त्यांनी उपस्थित शिक्षकांना केले.

आपल्या जिल्ह्यातील प्रत्येक विद्यार्थी हा आदर्श, सुसंस्कृत आणि सक्षम नागरिक व्हावा, हीच ‘निपुण पालघर’ची खरी फलश्रुती असेल, असे उद्‍गार शिक्षणाधिकारी सोनाली मातेकर यांनी काढले.