पनवेल, ता. १६ (बातमीदार) ः तालुक्यातील ७१ ग्रामपंचायतींपैकी ३५ ग्रामपंचायतींवर महिलाराज येणार आहे. मंगळवारी (ता. १५) काढलेल्‍या आरक्षण सोडतीत सर्वसाधारण आणि वेगळ्या प्रवर्गातील महिला सरपंचपदाच्या दावेदार असून उर्वरित जागेवर पुरुषांना संधी मिळणार आहे.
सोडत प्रक्रिया पार पडताच काही ठिकाणी आनंद तर काही ठिकाणी चिंतेचे वातावरण दिसून आले. गावचा पुढारी होण्याचे स्वप्न बाळगून अनेकांनी सरपंचपदाची तयारी केली होती.
आरक्षण सोडतीदरम्यान ग्रामीण भागातील नेते-पदाधिकाऱ्यांनी तालुकास्तरावर सोडतीच्या ठिकाणी गर्दी केली होती. सोडत जाहीर झाल्यानंतर इच्छुकांनी निम्मी निवडणूक जिंकल्याच्याच अविर्भावात केंद्रावर जल्लोष केला.

...............

उरणमध्ये ३५ ग्रामपंचायतींचे आरक्षण जाहीर
उरण (वार्ताहर) ः तालुक्यातील ३५ ग्रामपंचायतींच्या सरपंचांची आरक्षण सोडत तहसीलदार उद्धव कदम यांच्या अध्यक्षतेखाली पार पडली. यापैकी १७ ग्रामपंचायतींमध्ये महिलाराज येणार आहे.
महिला आरक्षणापैकी तालुक्यातील सर्वात मोठी ग्रुप ग्रामपंचायत चाणजे व चिर्ले ग्रामपंचायतीचे सरपंचपद अनुसूचित जमातीसाठी आणि रानसईचे सरपंचपद अनुसूचित जमाती (महिला) राखीव झाले आहे. विंधणे, सारडे, पागोटे, बांधपाडा, फुंडे, गोवठणे, पाणजे, धुतूम, चिरनेर, पुनाडे, नवघर या ग्रामपंचायतीत सर्वसाधारण महिलांचे आरक्षण पडले आहे. केगाव, पिरकोन, बोकडविरा, जुई आणि कळंबुसरे येथे नामाप्र (महिला) सरपंचपदाचे आरक्षण आले आहे. कोप्रोली, भेंडखळ, जसखार, घारापुरी, वशेणी, आवरे, दिघोडे, करळ, डोंगरी, नवीन शेवा आणि नागाव येथे सर्वसाधारण (खुला) सरपंच होणार आहे. नामाप्र (खुला) प्रवर्गासाठी हनुमान कोळीवाडा, वेश्वी, म्हातवली आणि सोनार ग्रामपंचायतीचे आरक्षण पडले आहे.