कालबाह्य वस्तू बाजारात आणणाऱ्या दोघांना अटक
सकाळ वृत्तसेवा
ठाणे, ता. १६ : नामांकित कंपनीच्या कालबाह्य वस्तू सुट्या करून त्यानंतर बाजारपेठेत विक्रीसाठी आणून गोरगरिबांच्या जीवाशी खेळणाऱ्या इको स्टार रिसायकलिंग ॲण्ड ई वेस्ट रिसायकलिंग कंपनीच्या दोन मालकांना ठाणे पोलिसांच्या गुन्हे शाखेने अटक केली. सध्या ते न्यायालयीन कोठडीत आहेत. दरम्यान, त्या कंपनीबाबत ठाणे शहर पोलिसांनी एक पाऊल टाकत, महाराष्ट्र प्रदूषण आणि जीएसटी या विभागांकडे पत्रव्यवहार करून तपासात समोर आलेल्या कंपनीच्या कारभाराबाबत माहिती मागितली आहे. त्यामुळे कंपनीच्या अडचणी आणखी वाढणार आहेत.
ठाणे पोलिसांच्या गुन्हे शाखेने १० जुलै रोजी शिळ-डायघर परिसरातील गोदामांवर धाड टाकली होती. एका नामांकित ऑनलाइन कंपनीचे कालबाह्य होणारे धान्य, पीठ आणि इतर वस्तू होत्या; मात्र या सामानांची विल्हेवाट न लावता त्यांना सुट्या करून बाजारात विक्रीसाठी २०२१ पासून सुरू आहेत. तसेच एकाच वर्षात कंपनीच्या मालकांनी स्वतःचे गोदाम खरेदी केल्याची माहिती तपासात पुढे आहे. याप्रकरणी पोलिसांनी मोहम्मद चौधरी आणि मोहम्मद इस्माईल शेख या दोघांना अटक केली आहे. ते सध्या १४ दिवसांच्या न्यायालयीन कोठडीत आहेत. तसेच याप्रकरणी आणखी चौघांची नावे निष्पन्न झाले असून, त्यांचा शोध सुरू आहे. या प्रकरणात आणखी काही नावे येण्याची शक्यताही पोलिसांनी वर्तवली आहे.