१०८ रुग्णवाहिका ठरतेय जीवनदायी
गेल्या ११ वर्षांत एक लाख ९६ हजार १४४ रुग्णांना सेवा
अलिबाग, ता. १६ (वार्ताहर) ः अपघात, गर्भवती महिला किंवा इतर गंभीर आजार झालेल्या रुग्णाला एका रुग्णालयातून दुसऱ्या रुग्णालयात अथवा मुंबई, पुणेसारख्या मोठ्या शहरांमध्ये नेण्यासाठी १०८ रुग्णवाहिकेमार्फत अगदी चोखपणे काम बजावले जात आहे. ही रुग्णवाहिका सेवा सुरू झाल्यापासून ३० जून २०२५ पर्यंत गेल्या ११ वर्षांत रायगड जिल्ह्यातील एक लाख ९६ हजार १४४ रुग्णांना जीवनदायी ठरली आहे.
शासकीय रुग्णालयात उपचार घेत असलेल्या रुग्णाला मुंबई, पुण्यासारख्या ठिकाणी घेऊन जाणे, अपघातग्रस्त रुग्ण, गर्भवती महिला, विषबाधा, आगीच्या घटनांमधील जखमी यांना वेळेत उपचार मिळावेत, यासाठी एका काॅलवर १०८ रुग्णवाहिका येते व आपली सेवा बजावत आहे. जिल्हा रुग्णालय, उपजिल्हा रुग्णालय आणि प्राथमिक आरोग्य केंद्रात एकूण चार एएलएस तसेच १९ बीएलएस अशा एकूण २३ रुग्णवाहिका सध्या जिल्हाभरात सेवा देत आहेत. ही रुग्णवाहिका सेवा सुरू झाल्यापासून ३० जून २०२५ पर्यंत गेल्या ११ वर्षांत रायगड जिल्ह्यातील एक लाख ९६ हजार १४४ रुग्णांना जीवनदायी ठरली आहे. त्याचप्रमाणे रुग्णवाहिकेमध्ये ६०५ गर्भवती महिलांच्या प्रसूती करण्यात आल्या असून ८३ रुग्णांना व्हेंटिलेटर सुविधा उपलब्ध करून देण्यात आली आहे.
...................
चौकट :
रुग्णवाहिकांची संख्या वाढविणे गरजेचे :
अनेक वेळा शासकीय रुग्णालयात उपचार घेत असलेल्या रुग्णाला मुंबई येथे हलविण्यासाठी १०८ रुग्णवाहिकेला संपर्क साधला जातो; मात्र त्या ठिकाणी रुग्णवाहिका नसल्यास ती दुसऱ्या तालुक्यातून बोलावण्यात येते. यात खूप वेळ वाया जातो. यामुळे रुग्णाच्या नातेवाइकांना इतर ठिकाणी शोधाशोध करावी लागते. ही परिस्थिती बदलण्यासाठी जिल्हा सामान्य रुग्णालय प्रशासन व जिल्हाधिकाऱ्यांच्या मार्गदर्शनाखाली आणखी १०८ रुग्णवाहिका उपलब्ध करून देण्याचा प्रस्ताव राज्य शासनाकडे पाठविण्यात आल्याची माहिती सामान्य रुग्णालय प्रशासनाकडून देण्यात आली आहे.
..............
कोट :
रायगड जिल्ह्यात २३ रुग्णवाहिका आहेत. रुग्णांना योग्य सुविधा देण्यासाठी अहोरात्र १०८ रुग्णवाहिका काम करीत आहे. काहीवेळा अंतर जास्त असल्याने अथवा इतर ठिकाणहून रुग्णवाहिका येण्यास विलंब होतो. ही अडचण असली तरी रुग्णाला दुसरी रुग्णवाहिका उपलब्ध करण्यासाठी प्रयत्नशील असतो. रुग्णाचा जीव वाचविणे हेच आमचे प्रथम कर्तव्य आहे. आम्ही आणखी रुग्णवाहिका मिळाव्यात, यासाठी प्रस्ताव पाठविला आहे. लवकरच त्याही उपलब्ध होतील.
- जीवन काटकर, जिल्हा व्यवस्थापक