पनवेल-माथेरान मार्गावरील नाले तुंबले
सफाईवेळी बाजूला टाकलेला कचरा पुन्हा गटारांमध्ये
नवीन पनवेल, ता. १६ (बातमीदार) ः पनवेल-माथेरान मार्गावरील नाले तुंबले आहेत. नालेसफाई करताना कर्मचाऱ्यांनी बाजूलाच ठेवलेला कचरा पावसाच्या पाण्यात वाहून पुन्हा नाल्यात पडत आहे. परिणामी नाल्यातील पाणी वाहून जाण्यास अडथळा निर्माण होत आहे. त्‍यामुळे परिसरात दुर्गंधी येत असून, डासांमुळे रोगराई पसरण्याची भीती व्‍यक्‍त केली जात आहे.
अर्धा पावसाळा संपत आला तरी महापालिकेच्या माध्यमातून अनेक ठिकाणी नालेसफाई, गटारांची स्वच्छता आदी भागात झालेली दिसून येत नाही, तर ज्‍या काही भागांत नालेसफाई झाली आहे, तेथील गाळ तसेच कचरा बाजूला ठेवण्यात आला आहे. त्‍यामुळे मुसळधार पावसात गाळ तसेच कचरा पुन्‍हा नाल्यामधे पडत आहे. यामुळे परिसरातील नाले तुंबण्याचे प्रकार वाढू लागले आहे. अशाच प्रकारे पनवेल-माथेरान मार्गावरील नाल्यांमध्ये कचरा पडला असून, ते तुंबले आहेत. प्लॅस्टिकच्या बाटल्या, कॅरिबॅग यासह आजूबाजूच्या वसाहतीमधील कचरा या नाल्यात पडत आहे. यामुळे नाले तुंबत असून, प्रवाह रोखला जात आहे. त्‍यामुळे परिसरात डासांचा उपद्रव वाढला आहे. त्यातून डेंगी, मलेरिया यासारख्या आजारांची लागण होण्याचा धोका निर्माण झाला आहे. प्रशासनाने वेळीच दखल घेऊन कारवाई करावी, अशी मागणी नागरिकांकडून करण्यात येत आहे.
....................
गेल्या वर्षीची पुनरावृत्ती टाळावी
मागील वर्षी नालेसफाईअभावी पावसाचे पाणी नागरिकांच्या घरात शिरले होते. तळमजल्यावरील घरांमध्ये कमरेपर्यंत पाणी शिरल्याने फ्रिजसह अन्य संसारोपयोगी साहित्याचे नुकसान झाले होते. त्‍यामुळे आगामी धोका लक्षात घेता गेल्या वर्षीची पुनरावृत्ती टाळण्यासाठी नालेसफाई करावी, अशी मागणी नागरिकांकडून करण्यात येत आहे.