पडघा, ता. १६ (बातमीदार) : मुंबई-नाशिक महामार्गावरील रस्त्यांच्या विविध मागण्यांसाठी शिवसेना ठाकरे, मनसे व इतर सामाजिक संघटनांच्या वतीने भिवंडी तालुक्यातील पडघा येथील टोल नाक्यावर मोर्चा धडकणार आहे. या वेळी टोल नाका बंद आंदोलन करण्यात येणार आहे.
पडघा टोल नाका रस्ता आणि त्यालगत असलेल्या सर्व्हिस रस्त्याची तत्काळ दुरुस्ती, परिसरातील विविध गावालगत सर्व्हिस रस्ते बनवणे, मुंबई-नाशिक महामार्गावरील शेरेकर पाडा व विविध गावांजवळ भुयारी मार्ग बनवणे, तळवली नाका येथील भुयारी रस्त्याचे काम लवकर करणे आदी मागण्यांसाठी ठाकरे गट, मनसे आणि पडघा परिसरातील सामाजिक संघटनांच्या वतीने टोल बंद आंदोलन करण्यात आले आहे. तशा आशयाचे निवेदन संबंधित शासकीय अधिकारी, राष्ट्रीय महामार्ग प्राधिकरणाला देण्यात आले होते. मात्र, पोलिस प्रशासनाच्या मध्यस्थीने आंदोलनकर्ते व महामार्ग प्राधिकरण अधिकारी यांच्यात दोन वेळा चर्चा अयशस्वी ठरल्याने हा मोर्चा गुरुवारी (ता. १७) पडघा गाव प्रवेशद्वार ते टोल नाका येथे धडकणार आहे. त्याची जय्यत तयारी झाल्याचे ठाकरे उपजिल्हाप्रमुख प्रकाश भोईर, भिवंडी लोकसभा जिल्हाध्यक्ष शैलेश बिडवी यांच्या वतीने सांगण्यात आले. या वेळी दोन्ही संघटना व इतर सामाजिक संघटनांचे जिल्ह्यातील प्रमुख नेते उपस्थित राहणार आहेत. या रस्त्यावरून प्रवास सुरक्षित होण्यासाठी नागरिकांनी मोठ्या संख्येने आंदोलनात सहभागी होण्याचे आवाहन करण्यात आले आहे.