विद्यार्थिनीचा हलगर्जीमुळे मृत्यू
सोनाळेप्रकरणी मुख्याध्यापक, शिक्षकांवर ठपका

वाडा, ता. १६ (बातमीदार) ः तालुक्यातील न्यू इंग्लिश स्कूल, सोनाळे या विद्यालयात एका पाचवीत शिकणाऱ्या विद्यार्थिनीच्या मृत्यू प्रकरणाची चौकशी जिल्हा परिषद पालघर माध्यमिक शिक्षण विभागाचे शिक्षणाधिकारी अशोक पाटील यांनी करून अहवालात मुख्याध्यापक व शिक्षकांवर हलगर्जीचा ठपका ठेवला आहे. शिवाय संस्थाचालकांना संबंधितांवर कारवाई करण्याचे आदेश देण्यात आले आहेत. या कारवाईमुळे संबंधितांचे धाबे दणाणले आहेत.
अहवालातील माहितीनुसार, तालुक्यातील बिलघर या गावात प्रकाश झाटे हे कुटुंबासह राहत असून, त्यांची मुलगी वेदिका (वय ११) पाचवीत न्यू इंग्लिश स्कूल, सोनाळे येथे शिक्षण घेत होती. २६ जूनला ती सकाळी १०.३० वाजता नेहमीप्रमाणे बहिणीसोबत पायी चालत शाळेत गेली. सायंकाळी ४.१५ वाजण्याच्या सुमारास न्यू इंग्लिश स्कूल शाळेचे शिक्षक मोतीराम नडगे हे वेदिका हिला त्यांच्या कारमधून घरी घेऊन आले. त्या वेळी वेदिका पूर्णपणे बेशुद्ध होती. याबाबत मोतीराम सरांना विचारले असता त्यांनी सांगितले, ‘दुपारी ३.३० वाजता मधली सुट्टी झाली तेव्हा तुमची मुलगी वेदिका हीस अचानक चक्कर येऊन ती बेशुद्ध झाली, म्हणून मी तिला घरी घेऊन आलो आहे.’ तेव्हा ‘शाळेच्या जवळच दवाखाना आहे, तेथे मुलीला का नेले नाही?,’ असे विचारले असता ते काही न बोलता निघून गेले. त्यानंतर बेशुद्ध अवस्थेत असलेल्या वेदिकेला मोटारसायकलवरून वाडा येथील ग्रामीण रुग्णालयात ४.४५ वाजता उपचारासाठी घेऊन गेले असता, तेथील डाॅक्टरांनी तिची तपासणी करून तिला मृत घोषित केले.
...
शिक्षणाधिकाऱ्यांकडून चौकशी
वेदिका हिच्यावर वेळेत उपचार केले असते तर तिचे प्राण वाचले असते. मुख्याध्यापक व शिक्षकांनी उपचार करण्यात उशीर केल्याने मुलीचा जीव गेला, असा आरोप विद्यार्थिनीचे वडील प्रकाश झाटे यांनी केला आणि मृत्यूची चौकशी करण्याची मागणी केली होती. त्या अनुषंगाने पालघर जिल्हा परिषदेचे मुख्य कार्यकारी अधिकारी मनोज रानडे यांनी या प्रकरणाची चौकशी करण्याचे आदेश दिले होते. ही चौकशी शिक्षण विभागाचे शिक्षणाधिकारी अशोक पाटील यांनी केली. त्यांनी वरिष्ठ अधिकाऱ्यांकडे अहवाल सादर केला असून, या अहवालात मुख्याध्यापक व शिक्षकांवर हलगर्जीचा ठपका ठेवण्यात आला आहे.