जनसुरक्षा कायद्याला आठवलेंचा पाठिंबा
मुंबई : राज्य सरकारने मंजूर केलेल्या जनसुरक्षा कायद्याला रामदास आठवले यांच्या रिपब्लिकन पक्षाने पाठिंबा दिला आहे. ‘सरकारने सर्व बाजूंचा विचार करूनच जनसुरक्षा कायदा केला आहे. त्यामुळे हिंसेचा मार्ग सोडून नक्षलवाद्यांनी न्यायासाठी लोकशाही मार्गाने लढा दिला पाहिजे. नक्षलवाद सोडून आंबेडकरवाद स्वीकारावा,’ असे आवाहन रामदास आठवले यांनी केले. जनसुरक्षा कायदा हा जनतेच्या हिताचा आहे. संविधानाने विधिमंडळाला कायदा करण्याचा अधिकार दिला आहे. त्यानुसार जनसुरक्षा कायदा विधिमंडळात संमत झालेला आहे. विद्रोही लेखन जरूर करावे, नक्षलवाद्यांच्या हिंसक मार्गाला पाठिंबा आणि प्रोत्साहन देणारे लेखन करू नये, असेही आठवले यांनी सांगितले. ‘हिंसक मार्गामुळे हजारो नक्षलवादी मारले गेले आहेत. आम्हीसुद्धा दलित पँथरच्या चळवळीत संघर्ष केला आहे. आमच्या दलित पँथरला कोणीही नक्षलवादी म्हटले नाही. जनसुरक्षा कायद्यामुळे कोणाही निरपराधाला जाणीवपूर्वक नक्षलवादी ठरवू नये. जर असे चुकीचे प्रकार घडून अन्याय होऊ लागला तर या कायद्यात बदल करण्याचा अधिकार विधिमंडळाला आहे,’ असेही रामदास आठवले यांनी सांगितले.