विजेचा लपंडाव; नागरिक त्रस्त
सकाळ वृत्तसेवा
डोंबिवली, ता. १७ : शहरातील पश्चिमेतील गरिबाचापाडा, देवीचापाडा, महाराष्ट्रनगर भागात दररोज वीजप्रवाह खंडित होत आहे. विजेच्या सततच्या लपंडावामुळे नागरिक त्रस्त आहेत. एक दोन तासांनी वीजप्रवाह सुरू झाल्यानंतर पुन्हा काही वेळाने तो खंडित होत आहे. दिवस, रात्र हा प्रकार सुरू असल्याच्या नागरिकांच्या तक्रारी आहेत.

डोंबिवली पश्चिमेतील गरिबाचापाडा, महाराष्ट्र नगर, देवीचापाडा, नवापाडा भागात दिवस रात्र हा वीजपुरवठा खंडित होत आहे. डोंबिवलीतील खंबाळपाडा, ९० फुटी रस्ता भागातील रहिवासी ही सततच्या खंडित वीजपुरवठ्याने हैराण आहेत. सकाळच्या वेळेत कामावर जाण्याची, मुलांना शाळेत जाण्याची गडबड सुरू असते. अशावेळी वीजप्रवाह खंडित झाला गोंधळ उडत आहे, कामे ठप्प होतात. रात्री कामावरून दमून आल्यानंतरदेखील घरात तीच परिस्थिती असल्याने नागरिक त्रासले आहेत. मुलांना अभ्यास करतानादेखील अडचणी येत आहेत.

वीजप्रवाह खंडित झाल्यानंतर यासंदर्भात कारण विचारण्यासाठी महावितरणच्या सुविधा क्रमांकावर नागरिक संपर्क साधतात. वीजपुरवठा पूर्ववत होईपर्यत संपर्क क्रमांक सतत व्यस्त येत असतो, अशा तक्रारी नागरिकांनी केल्या आहेत. पावसामुळे डासांचे प्रमाण वाढले आहे. रात्रीच्या वेळेत वीजपुरवठा खंडित झाल्यास हवा येण्यासाठी दरवाजा खिडक्या उघडे ठेवले तर घरात डास येतात. डेंगी, मलेरिया साथीचा वाढता प्रभाव विचारात घेत वीजप्रवाह बंद झाल्यानंतर घराच्या दरवाजा, खिडक्या उघड्या ठेवणे भीतीदायक झाले आहे, असे नागरिकांनी सांगितले.

जुन्या रोहित्रावर भार
डोंबिवली पश्चिमेत अनेक ठिकाणी महावितरणच्या जुन्या वीजवाहिन्या आहेत. या वाहिन्यांच्चा ठिकाणी नवीन वाहिन्या टाकून वीजप्रवाह सुस्थितीत करण्याची गरज आहे. या कामासाठी आवश्यक निधी उपलब्ध होत नसल्याने महावितरणचे स्थानिक अधिकारी वीजवाहिनीचा खराब झालेला भाग जोडून आहे, त्या वीजवाहिनीतून प्रवाह सुरू करतात. पावसामुळे अशा वाहिनीत पाणी गेले की ती वाहिनी पुन्हा खराब होतात अन् वीजपुरवठा खंडित होतो. काही ठिकाणी उंच गृहसंकुले उभी राहिली आहेत, त्या गृहसंकुलांना स्वतंत्र रोहित्र नसल्याने जुन्या रोहित्रावरून वीजपुरवठा केला जातो. विजेच्या वाढत्या मागणीमुळे या रोहित्रावर भार येऊन तांत्रिक अडचणी निर्माण होतात, यामुळे वीजपुरवठा खंडित होतो, असे जाणकार संगतात.