जंजिरे वसई किल्ल्यावर विशेष उपक्रमाचे आयोजन
ऐतिहासिक पेशवेकालीन श्री हनुमंत मंदिराला २८६ वर्षे पूर्ण
विरार, ता. १७ (बातमीदार) ः जंजिरे वसई किल्ल्यावरील पेशवेकालीन श्री हनुमंताचे मंदिर आहे. या मंदिराला यंदा रविवारी (ता. २७) तब्बल २८६ वर्षे पूर्ण होत आहेत. यानिमित्ताने जंजिरे वसई किल्ल्यावर विशेष उपक्रमाचे आयोजन केले आहे.
यंदाही दरवर्षीच्या परंपरेप्रमाणे सकाळी किल्ले वसई मोहीम परिवारांतर्गत श्री हनुमंताचे पूजन करण्यात येईल. ऐतिहासिक बंदर दरवाजा सध्या दर्या, जेट्टी, समुद्र दरवाजा या नावाने ओळखला जातो. दरवर्षीप्रमाणे मंदिराची नित्य अखंड सेवा करणारे म्हात्रे कुटुंबीय कार्यक्रमात योगदान देणार आहे. किल्ले वसई मोहिमेचे प्रमुख व इतिहास अभ्यासक श्रीदत्त राऊत सविस्तर इतिहास मार्गदर्शन करतील. यात मंदिराची उभारणी, प्रवेशद्वार नामावली, इतर दैवते, स्थान निश्चिती, बुरुजांची नावे या संदर्भातील कागदपत्रे सादर करतील.
सकाळी पवित्र जल अभिषेक, हनुमंत पालखी प्रदक्षिणा, समुद्र पूजन, वास्तुदेवता पूजन होईल. या ऐतिहासिक दिवसाचे औचित्य साधून जंजिरे वसई किल्ल्यावर श्री हनुमानास तब्बल महाराष्ट्रातील ३२ किल्ले, भारतातील प्रमुख ११ नद्या, ऐतिहासिक पावनखिंड, वसईमधील प्रमुख तीर्थक्षेत्रे यांतून आणलेल्या जलाने अभिषेक होईल. शिवशौर्य ट्रेकर्स मुंबईचे दुर्गमित्र प्रतिनिधी शार्दूल खरपुडे यांनी संकलित केलेल्या जलाने व संकल्पनेने जंजिरे वसई किल्ल्यावर हे पवित्र जल आणण्यात येत आहे. श्रीदत्त राऊत यांनी वसईमधील प्राचीन तीर्थस्थानांवरील जल संकलित केले आहे. अधिक माहितीसाठी किल्ले वसई मोहीम प्रमुख ९७६४३१६६७८ यांच्याशी संपर्क करण्याचे आवाहन आयोजकांनी केले आहे.

पेशवेकालीन श्री हनुमंत मंदिर
जंजिरे वसई किल्ल्याच्या दर्या दिंडी बंदर दरवाजाजवळच कौलारू छपरांचे सुंदर व आटोपशीर आकाराचे पेशवेकालीन श्री हनुमंताचे मंदिर आहे. या मंदिराच्या आतील भागात घुमटीयुक्त देवडीत श्री हनुमानाची वैशिष्ट्यपूर्ण मूर्ती आहे. ऐतिहासिक संदर्भानुसार १६ मे १७३९ रोजी नरवीर चिमणाजी आप्पांच्या नेतृत्वाखाली मराठ्यांनी जंजिरे वसई कोटावर विजय मिळवला. यानंतर २७ जुलै १७३९ रोजी जंजिरे वसई किल्ल्यातील बंदर दरवाजा व महादरवाजा या ठिकाणी प्रत्येकी एक याप्रमाणे श्री हनुमानाच्या मूर्तीची प्रतिष्ठापना करण्यात आली.