विद्या भवन शाळेच्या विद्यार्थ्यांचे शिष्यवृत्ती परीक्षेत घवघवीत यश
घाटकोपर (बातमीदार) : महाराष्ट्र राज्य परीक्षा परिषद, पुणे यांच्या वतीने राष्ट्रीय आर्थिक दुर्बल घटकातील विद्यार्थ्यांसाठी शिष्यवृत्ती परीक्षा फेब्रुवारीमध्ये घेण्यात आली. यामध्ये पुणे विद्यार्थी गृह संस्थेच्या घाटकोपर पूर्व येथील विद्या भवन शाळेतील मराठी व इंग्रजी माध्यमातील एकूण ८९ विद्यार्थ्यांनी यश मिळवले आहे. यामध्ये इयत्ता पाचवी मराठी माध्यम (सेमी इंग्रजी) १४ तर इंग्रजी माध्यमाच्या २६ विद्यार्थ्यांना शिष्यवृत्ती मिळाली आहे. इयत्ता आठवीच्या मराठी माध्यम १२ तर इंग्रजी माध्यमाच्या ३७ विद्यार्थ्यांनी शिष्यवृत्ती प्राप्त केली आहे. या सर्व यशस्वी विद्यार्थ्यांचे व त्यांना मार्गदर्शन करणारे शिक्षक, प्राचार्या योगिनी पोतदार, मुख्याध्यापक सुनील पाटील यांचे संस्थेचे कार्याध्यक्ष राजेंद्र बोऱ्हाडे यांनी अभिनंदन केले.