भिवंडी, ता. १७ (बातमीदार) : भिवंडी-निजामपूर शहर महापालिका पाणीपुरवठा विभागाने कोंबडपाडा-संगमपाडा येथील जलकुंभ भरण्यासाठी नाल्यातून मुख्य जलवाहिनी नेली आहे. त्या जलवाहिनीला छिद्र पाडून भिवंडीकरांचे लाखो रुपयांचे पिण्याचे पाणी चोरून ग्रामीण भागातील मीठपाडा येथीव चाळीतील नागरिकांसाठी नेण्यात आली आहे. याप्रकरणी निजामपूर पोलिस ठाण्यात गुन्हा दाखल झाला आहे.
शहरातील कोंबडपाडा-संगमपाडा येथे असलेल्या जलकुंभात पाणी भरण्यासाठी महापालिकेच्या नाल्यामधून जलवाहिनी नेलेली आहे. या जलवाहिनीला छिद्र पाडून रवी गायधर सिंह याने कासारआळी-कोंबडपाडा भागातील भंडारी गोदामाच्या बाजूने नळजोडणीसाठी जलवाहिनी अंथरली आहे. ही जलवाहिनी पुढे कामवारी नदीतून मीठपाडा येथे नेहापार्कमधील चाळीत जाते. ही माहिती मिळाल्यानंतर महापालिकेच्या पाणीपुरवठा विभागाचे कार्यकारी अभियंता संदीप पटणावर, उपअभियंता सरफराज अन्सा‍री, भरारी पथकप्रमुख विराज भोईर यांनी घटनास्थळी जाऊन पाहणी केली. भंडारी गोदामाजवळ नाल्यात असलेल्या मुख्य जलवाहिनीला छिद्र पडून एक व्यासाचे दोन नळजोडणी नाल्यातून आणि कामवारी नदीतून ग्रामीण भागातील नेहा पार्क, मीठपाडा येथील चाळीसाठी अनधिकृतपणे घेतल्याचे आढळून आले. यात जलवाहिनीचे नुकसान झाले असून, घरगुती जोडणीनुसार १२ हजारांप्रमाणे ९६ हजार रुपयांची पाणीचोरी केल्याचे आढळून आले. असे चार वर्षांचे मिळून १ लाख ९२ हजार रुपयांचे नुकसान झाले आहे. याप्रकरणी रवी सिंहविरोधात निजामपुरा पोलिस ठाण्यात गुन्हा दाखल केल्याची माहिती महापालिकेच्या पाणीपुरवठा विभागाचे कार्यकारी अभियंता संदीप पटनावर यांनी दिली.