जव्हार, ता. १७ (बातमीदार) : तालुक्यात मोफत शिक्षणाच्या माध्यमातून विद्यार्थ्यांना मध्यान्ह भोजन देत शिक्षणाची सुविधा निरनिराळ्या योजनांच्या माध्यमातून उपलब्ध करून देण्यात आली आहे. याचा लाभही अनेक विद्यार्थ्यांनी घेतला आहे, मात्र हे जरी खरे असले तरी, सध्या तालुक्यातील अनेक शाळांमध्ये शिक्षक, मुख्याध्यापकांची पदे रिक्त असल्याने या मुलांचे भवितव्य टांगणीला लागले आहे. जिल्हा परिषदेच्या हातेरी शाळेत नववी आणि दहावीसाठी एकही शिक्षक नाही. येथील पालक संतप्त होऊन जोपर्यंत शाळेत शिक्षक मिळणार नाही, तोपर्यंत आमची मुले गुरे चारतील, असा पवित्रा घेतला आहे.

तालुक्यातील हातेरी जिल्हा परिषद शाळेत इयत्ता पहिली ते दहावीपर्यंत एकूण २३३ विद्यार्थी शिक्षण घेत आहेत. नववी आणि दहावीत एकूण ५७ मुले शिक्षण घेत आहेत. या दोन्ही वर्गांना एकही शिक्षक नाही. तीन शिक्षक पदे रिक्त आहेत. त्यामुळे महत्त्वाचे वर्ष असणाऱ्या या विद्यार्थ्यांना शिक्षण घेताना मोठ्या प्रमाणात समस्या येत आहेत.

दुर्गम आणि आदिवासी भागात शिक्षणाच्या विविध संधीच्या माध्यमातून येथील विद्यार्थ्यांची भवितव्य उजळले आहेत, मात्र तालुक्यातील शाळांमध्ये अनेक शिक्षक हे नियतकालीन सेवानिवृत्त झाल्याने त्या जागेवर नव्या शिक्षकांची नेमणूक झाली नाही. परिणामी वरिष्ठ वर्गात शिक्षण घेत असलेल्या विद्यार्थ्यांत शिक्षणाचे महत्त्व कमी होऊ लागले आहे. त्याकरिता सरकार आणि प्रशासन स्तरावर त्वरित निर्णय घेऊन येथील मुलांच्या शिक्षणाचे भवितव्य वाढीस लागेल, यासाठी प्रयत्न व्हावेत, अशी मागणी पालकांनी पंचायत समितीच्या शिक्षण विभागाकडे केल्याचे सांगितले.

हातेरी शाळेत माध्यमिक शिक्षक दिल्याशिवाय आमच्या मुलांना शाळेत पाठविणार नाही, असा आम्ही ग्रामस्थांनी निर्णय घेऊन मागील आठवड्यात गटशिक्षणाधिकारी यांना निवेदन दिले आहे.
- जगदीश जंगली, पालक

हातेरी शाळेतील शिक्षक रिक्त पदांबाबत पालघर जिल्हा शिक्षणाधिकारी यांना कळविले आहे. दहावीच्या वर्गासाठी शिक्षकांची मागणी केली आहे. काही दिवसांत शिक्षक मिळेल, असे वरिष्ठांचे म्हणणे आहे.
- विजया टाळकुटे, गटशिक्षणाधिकारी, जव्हार पंचायत समिती