अवजड वाहतुकीविरोधात दुरशेत ग्रामस्थांची जलसमाधी
पेण, ता. १७ (वार्ताहर) : मुंबई-गोवा महामार्गालगत असणाऱ्या दुरशेत गावाकडून येणाऱ्या गौण खनिज ओव्हरलोड वाहनांमुळे रस्त्यावर होणाऱ्या अपघाताची भीती पाहता येथील नागरिक भयभीत झाले आहेत. त्यामुळे अवजड वाहतुकीविरोधात दुरशेत ग्रामस्थांनी गुरुवारी (ता. १७) बाळगंगा नदीपात्रात जलसमाधी आंदोलन केले. या वेळी प्रांताधिकारी प्रवीण पवार यांनी आंदोलनाला भेट देऊन त्यांच्याबरोबर चर्चा करून मागण्यांबाबत येत्या मंगळवारी (ता. २२) प्रांत कार्यालय येथे बैठक घेऊन यातून मार्ग काढण्यात येईल, असे आश्वासित केल्यानंतर आंदोलन स्थगित करण्यात आले. तालुक्यातील दुरशेत हद्दीत गौण खनिज प्लांटमुळे रस्त्यावरून जाणाऱ्या ओव्हरलोड गाड्यांमुळे दिवसेंदिवस अपघातांचे प्रमाण वाढत आहे. शिवाय रस्‍तादेखील मोठ्या प्रमाणात खराब झाला आहे. त्यामुळे बाजूला असणारे बाळगंगा धरण आणि ऐतिहासिक किल्ल्याला उद्भवणारा धोका पाहता दुरशेत रस्त्यावरून होणारी ओव्हरलोड वाहतूक तत्काळ बंद करण्यात यावी, याकरिता अनेकदा मागणी करून आंदोलने केली. दरम्यान, प्रशासन दुर्लक्ष करीत असल्याने अखेर ग्रामस्‍थांनी जलसमाधी आंदोलन केले. सकाळी काही तास वाट पाहिल्यानंतर असह्य झालेल्या आंदोलनकर्त्यांनी बाळगंगा नदीपात्रात उड्या मारून आंदोलनाला सुरुवात केली. त्यानंतर दुपारी प्रांताधिकारी प्रवीण पवार यांनी आंदोलन ठिकाणी भेट देत आंदोलनकर्त्यांबरोबर चर्चा करून ज्या मागण्या आहेत त्यावर येत्या मंगळवारी (ता. २२) रोजी प्रांताधिकारी कार्यालयात बैठक लावून सोडविण्यात येतील, असे आश्वासन दिल्यावर आंदोलनकर्त्यांनी आंदोलन तूर्तास मागे घेतले. या आंदोलनप्रसंगी प्रशासनाचे विभागीय पोलिस उप अधीक्षक गजानन टोम्पे, नायब तहसीलदार प्रसाद कालेकर, पेण पोलिस निरीक्षक संदीप बागूल, वडखळ पोलिस निरीक्षक प्रसाद पांढरे, दादर सागरी पोलिस निरीक्षक संजयकुमार ब्राह्मणे तसेच आंदोलनकर्ते उदय गावंड, मिलिंद गावंड, अजय भोईर, सूरज भोईर, नीलेश डंगर, सामाजिक कार्यकर्ते संतोष ठाकूर, वैशाली पाटील, मोहिनी गोरे, शिवसेना ठाकरे गटाचे जिल्हा संपर्कप्रमुख प्रसाद भोईर, मनसे जिल्हा उपाध्यक्ष संदीप ठाकूर आदींसह ग्रामस्थ मोठ्या प्रमाणावर उपस्थित होते.