सकाळ वृत्तसेवा
मुंबई, ता. १९ ः शहरांसह पश्चिम तसेच पूर्व उपनगरांतील महापालिकेच्या विविध आरक्षित ६४ भूखंडांवर ५१ हजार ५८२ झोपड्या आहेत. या झोपड्यांचे पुनर्वसन केले जाणार असून ४७ योजनांपैकी शहर, पश्चिम उपनगरांतील २२ योजनांना सर्वाधिक प्रतिसाद मिळाला आहे. त्यामुळे येत्या काळात झोपडपट्टी पुनर्विकासाला वेग येणार आहे.
पालिकेकडून या भूखंडावरील झोपडीधारकांच्या योजनांची माहिती, विकसक नेमण्याची चाचपणी सुरू झाली आहे. यासाठी पालिकेकडून  पात्र, अनुभवी विकसकांकडून स्वारस्याची अभिव्यक्ती (ईओआय) मागवण्यात आली होती.  निविदापूर्व बैठकीत ४० हून अधिक विकसकांनी सहभाग घेतला. यामध्ये अदाणी रियॅलिटी, वाधवा ग्रुप, दोस्ती, चांडक, रुस्तम जी, जेएसडब्ल्यू रियल्टी, डीएचएस ग्रुप, जलाराम, निलयोग, आशा डेव्हलपर्स अशा बड्या विकसकांचा समावेश होता.
.............
महसूल वाढणार
पालिकेच्या ६४ भूखंडांचा पुनर्विकास
सहा लाख ७७ हजार चौरस मीटर जागा
झोपूअंतर्गत ३९ हजार ७६६ झोपडीधारकांना घरे
पालिकेला ८४६ कोटींचा महसूल
--------------------------------
पात्रता निश्चितीसाठी पडताळणी
४७ भूखंडावरील योजनांसाठी ८६ विकसकांनी निविदा भरल्या. पात्रता निश्चित करण्यासाठी आठवडाभरात पडताळणी सुरू होईल. यात पात्रता निश्चित झाल्यावर सर्वाधिक प्रिमियम देणाऱ्या विकसकांची निवड केली जाणार आहे.