वाढवणमध्ये जमिनीच्या हडप प्रकरणावरून गुन्हा दाखल
तारापूर, ता. १८ (बातमीदार) : पालघर जिल्ह्यातील आंबिष्टेवाडी, वाढवण येथे बनावट कागदपत्रांच्या आधारे जमीन हडपल्याप्रकरणी पाच जणांविरोधात गुरुवारी (ता. १७) रात्री वानगाव पोलिस ठाण्यात गुन्हा दाखल करण्यात आला आहे.
बारकू महाद्या भंडारी यांच्या नावे असलेल्या १.०१.०० हेक्टर जमिनीवर त्यांची मुलगी वेणूबाई बाबुराव पाटील व त्यांचे कुटुंबीय यांचा ताबा असून, ४० वर्षांपासून ते या जमिनीवर शेती करत आहेत; मात्र राजेंद्र दशरथ राऊत यांनी रोहित दत्तात्रय राऊत यांच्या मदतीने आपल्या मृत आजोबांच्या नावाच्या साधर्म्याचा गैरफायदा घेतला. त्यांनी बनावट कागदपत्रे तयार करून महसूल अधिकाऱ्यांच्या मदतीने जमिनीच्या सातबारा उताऱ्यावर बारकू राऊत यांच्या वारसांची नोंद केली आणि जमीन हडपली, अशी तक्रार हर्षद पाटील यांनी केली होती. बोईसर उपविभागीय पोलिस अधिकारी विकास नाईक यांनी केलेल्या सखोल चौकशीनंतर राजेंद्र राऊत, रोहित राऊत, मंगळा बारक्या राऊत, गणेश बारकू राऊत आणि वत्सला दत्तात्रय राऊत यांच्या विरोधात वानगाव पोलिस ठाण्यात विविध कलमांखाली गुन्हा दाखल करण्यात आला आहे.