रस्ते उभारणीसाठी २०१ कोटींचा निधी
कल्याण पूर्वेतील चेतना नाका ते नेवाळी नाका आणि यू टाइपचे होणार काँक्रीटीकरण
सकाळ वृत्तसेवा
डोंबिवली, ता. १८ ः कल्याण पूर्वेतील चेतना नाका ते नेवाळी नाका रस्त्याच्या काँक्रीटीकरणासाठी एमएमआरडीएने १२४.८७ कोटी रुपयांच्या निधीला प्रशासकीय मान्यता दिली आहे. लवकरच या रस्त्याच्या कामाची निविदा काढली जाणार आहे. कल्याण पूर्वेतील काटेमानिवली, सिद्धार्थनगर, तीसगाव नाका हा यू टाइप रस्ता हा महत्त्वाचा रस्ता आहे. या रस्त्याच्या सिमेंट काँक्रीटीकरणाकरिता एमएमएमआरडीएने ७६.८८ कोटी रुपयांच्या निधीला प्रशासकीय मान्यता दिली. या रस्त्याच्या कामाचीही निविदा लवकरच काढली जाणार आहे. हा रस्ता झाल्याने कल्याण पूर्वेतील वाहतुकीला अधिक गती मिळणार आहे.
तर कल्याण पूर्वेतील चेतना नाका ते नेवाळी नाका रस्ता सिमेंट काँक्रीटीकरणाचा करण्यात यावा, अशी मागणी होती. या मागणीनुसार हा रस्ता सिमेंट काँक्रीटीकरणाचा करण्यात येणार आहे. या रस्त्याच्या सिमेंट काँक्रीटीकरणासाठी एमएमआरडीएने १२४.८७ कोटी रुपयांच्या निधीला प्रशासकीय मान्यता दिली. लवकर रस्त्याच्या कामाची निविदा काढली जाणार आहे.
या रस्त्यांच्या मंजुरीसाठी आणि निधीची उपलब्धता करून दिल्याबद्दल खासदार डॉ. श्रीकांत शिंदे यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांचे आभार मानले आहेत.

कल्याण ग्रामीण आणि कल्याण पूर्व जोडले जाणार
कल्याण चेतना नाका ते नेवाळी हा महत्त्वपूर्ण रस्ता आहे. कल्याणहून हा रस्ता मलंगगडाकडे जातो, तसेच तो नेवाळी नाक्यावर अंबरनाथमध्ये काटई रस्त्याला मिळतो. या रस्त्याने खोणी तळोजाकडे, पनवेल, पुणे, नवी मुंबई, बदलापूर, कर्जतकडे जाता येते. हा रस्ता कल्याण ग्रामीण आणि कल्याण पूर्व या दोन्ही विधानसभा मतदारसंघांना जोडणार आहे. हा रस्ता सिमेंटचा करण्यात यावा, अशी मागणी होती. यानुसार खासदार डॉ. श्रीकांत शिंदे यांनी पाठपुरावा केला आणि रस्त्याला मंजुरी मिळाली.