ठाण्यात मंगळवारी पाणीबाणी
सकाळ वृत्तसेवा
ठाणे, ता. १८ :
ठाणे महानगरपालिकेला स्टेम प्राधिकरणाकडून होणारा पाणीपुरवठा मंगळवारी (ता. २२) सकाळी ९ वाजल्यापासून बुधवारी (ता. २३) सकाळी ९ वाजेपर्यंत असा २४ तासांचा शटडाऊन घेऊन बंद ठेवण्यात येणार आहे. महावितरण कंपनीमार्फत शहाड येथील अशुद्ध जल उदंचन केंद्रावर मीटर बदलण्याचे काम व शहाड येथील अशुद्ध जल उदंचन केंद्र येथील पाइपलाइन गळती होत असून, ती बंद करण्याची आवश्यक कामे करण्यात येणार असल्याने या कालावधीत शहरातील पाणीपुरवठा बंद ठेवला जाणार आहे.
ठाणे महानगरपालिकेच्या स्वत:च्या पाणीपुरवठा योजनेचे नियोजन करून टप्प्याटप्प्याने ठाणे शहरात एक वेळ पाणीपुरवठा सुरू ठेवण्याचे नियोजन करण्यात आलेले आहे. या शटडाऊनमुळे पाणीपुरवठा पूर्वपदावर येईपर्यंत पुढील एक ते दोन दिवस कमी दाबाने पाणीपुरवठा होण्याची शक्यता आहे. तरी नागरिकांनी पाण्याचा योग्य तो साठा करून ठेवावा तसेच पालिकेस सहकार्य करावे, अशी विनंती पाणीपुरवठा विभागाने केली आहे.

या ठिकाणी पाणीपुरवठा बंद
या कालावधीत घोडबंदर रोड, पातलीपाडा, बाळकुम, ब्रह्मांड, पवारनगर, कोठारी कम्पाउंड, डॉगरीपाडा, वाघबीळ, आदी ठिकाणाचा पाणीपुरवठा मंगळवारी सकाळी ९ ते रात्री ९ वाजेपर्यंत बंद राहील व समतानगर, प्रऋतुपार्क, सिद्धेश्वर, इंटरनिटी, जॉन्सन, जेल, साकेत, उथळसर, रेतीबंदर, कळव्याच्या व मुंब्य्राचा काही भाग मंगळवारी रात्री ९ ते सकाळी ९ वाजेपर्यंत बंद राहील. अशारीतीने टप्प्याटप्प्याने एक वेळ पाणीपुरवठा सुरू ठेवण्याचे नियोजन करण्यात आले असल्याची माहिती महापालिकेच्या पाणीपुरवठा विभागाने दिली.