अंत्यसंस्कारासाठी ऑनलाइन नोंदणी
महापालिकेचे तंत्रस्नेही पाऊल

सकाळ वृत्तसेवा
मुंबई, ता. १८ ः मुंबई महानगरातील नागरिकांना सुलभ सेवा देण्यासाठी महापालिकेने तंत्रज्ञानस्नेही पाऊल टाकले आहे. भौगोलिक माहिती यंत्रणेवर आधारित ‘स्मशानभूमी व्यवस्थापन प्रणाली’ सुरू करण्यात येणार आहे. या सेवेच्या माध्यमातून मुंबई महापालिका चालवत असलेल्या स्मशानभूमी व दफनभूमींमध्ये अंत्यसंस्कारासाठी ऑनलाइन नोंदणी करण्याची सेवा उपलब्ध होणार आहे. शनिवारपासून (ता. १९) ही सेवा उपलब्ध होणार आहे.
पालिका प्रशासन मुंबईकरांसाठी आधुनिक तंत्रज्ञानावर आधारित विविध सेवा उपलब्ध करून देत आहे. याचाच एक भाग म्हणून पालिकेचे सार्वजनिक आरोग्य खाते आणि माहिती तंत्रज्ञान विभागामार्फत भौगोलिक माहिती प्रणालीवर आधारित स्मशानभूमी व्यवस्थापन प्रणाली सुरू करणार आहे. अंत्यसंस्काराची नोंदणी केल्यानंतर तयार होणाऱ्या नोंदणी क्रमांकामुळे नोंदणीची खात्रीलायक माहिती नागरिकांना प्राप्त होणार आहे.
अंत्यसंस्कारासाठी येणाऱ्या नागरिकांना या प्रणालीच्या माध्यमातून वेळेचे नियोजन करणे सोपे होईल. तसेच, स्मशानभूमीतील कार्यरत कर्मचाऱ्यांसमवेत समन्वय साधण्याकरिता ही प्रणाली उपयुक्त ठरेल. यासोबत ऑफलाइन व्यवस्था सुरू असणार असल्याचे पालिका प्रशासनाने स्पष्ट केले आहे.
...
कशी मिळणार सुविधा?
स्मशानभूमी व्यवस्थापन प्रणाली/ॲप्लिकेशन शनिवारपासून मुंबई महापालिकेचे संकेतस्थळ https://portal.mcgm.gov.in वर नागरिकांसाठी ‘अर्ज करा’ या सदरात उपलब्ध होणार आहे.
...
सुविधा कोणत्या?
- निधन झालेल्या व्यक्तीच्या स्थानापासून पाच किलोमीटर परिसरातील किंवा इतर स्मशानभूमी/दफनभूमीमध्ये अंत्यसंस्कारासाठी स्लॉट बुक करणे.
- स्मशानभूमी/दफनभूमीमधील उपलब्धता पाहणे.
- नागरिकांच्या प्रथेनुसार निवडीचा पर्याय
- अंत्यसंस्काराच्या नोंदणीची माहिती ‘एसएमएस’द्वारे मिळेल.