बीडीडीतील इमारतींना भोगवटा प्रमाणपत्र

सकाळ वृत्तसेवा
मुंबई, ता. १८ : म्हाडाकडून बीडीडी चाळींचा पुनर्विकास केला जात आहे. त्यानुसार पहिल्या टप्प्यात वरळी येथे उभारण्यात आलेल्या दोन इमारतींना भोगवटा प्रमाणपत्र (ओसी) मिळाले आहे. त्यामुळे ५५६ बीडीडीवासीयांना हक्काचे घर देण्याचा मार्ग मोकळा झाला आहे.
वर्षानुवर्षे बीडीडी चाळीत दिवस काढणाऱ्या रहिवाशांचे हक्काच्या घराचे स्वप्न पूर्ण करण्यासाठी म्हाडाकडून वरळी, नायगाव आणि ना. म. जोशी मार्ग येथील बीडीडी चाळींचा पुनर्विकास केला जात आहे. त्यानुसार वरळी बीडीडीच्या जागेवर इमारत एकमधील दोन विंगचे काम पूर्ण झाले असून, अग्निशमन दलाच्या एनओसीमुळे भोगवटा प्रमाणपत्र मिळू शकले नव्हते, मात्र म्हाडाने अग्निशमन दलाने सुचवलेल्या तांत्रिक बाबींची पूर्तता केल्यानंतर ती मिळाली व त्यानंतर पाणी जोडणीचे काम पूर्ण झाल्याने दोन्ही इमारतींना ओसी मिळाली असल्याचे म्हाडाच्या एका वरिष्ठ अधिकाऱ्याने सांगितले.