पतीशी शारीरिक संबंध नाकारणे, संशय घेणे क्रौर्यच
दोन्ही कारणे घटस्फोटासाठीचे आधार; उच्च न्यायालयाचे निरीक्षण 
सकाळ वृत्तसेवा
मुंबई, ता. १९ : पतीशी शारीरिक संबंध नाकारणे आणि त्याच्यावर विवाहबाह्य संबंध असल्याचा संशय घेणे हे क्रौर्यच आहे. ही दोन्ही कारणे घटस्फोट मागण्यास पुरेशी असल्याचे निरीक्षण नुकतेच उच्च न्यायालयाने नोंदवले. 
२०१३मध्ये लग्न झालेले जोडपे डिसेंबर २०१४पासून वेगवेगळे राहू लागले. २०१५मध्ये याचिकाकर्तीच्या पतीने पुणे कौटुंबिक न्यायालयात क्रौर्याच्या आधारे घटस्फोटासाठी अर्ज केला. याचिकेनुसार सासरच्यांनी तिचा छळ केला; परंतु तिचे पतीवर खूप प्रेम आहे आणि याच कारणास्तव लग्न मोडायचे नसल्याचे याचिकाकर्तीचे म्हणणे होते. तथापि, याचिकाकर्तीने आपल्याशी शारीरिक जवळीक नाकारली, आपल्यावर विवाहबाह्य संबंध असल्याचा संशय घेतला तसेच कुटुंबीय, मित्र, नातेवाइकांपुढे अपमानस्पद वागणूक देऊन मानसिक त्रास दिल्याचा दावा प्रतिवादी पतीने सुनावणीवेळी केला होता.
हा युक्तिवाद ऐकल्यानंतर याचिकाकर्तीचे पतीशी असलेले वर्तन हे त्याच्यासाठी क्रौर्यच मानले जाऊ शकते, असेही न्या. रेवती मोहिते डेरे आणि न्या. डॉ. नीला गोखले यांच्या खंडपीठाने कौटुंबिक न्यायालयाच्या घटस्फोट मंजूर करण्याच्या आदेशाला आव्हान देणाऱ्या महिलेला दिलासा नाकारताना आदेशात स्पष्ट केले. कौटुंबिक न्यायालयाने उपरोक्त दोन कारणांच्या आधारे याचिकाकर्तीच्या पतीची घटस्फोटाची मागणी मंजूर केली होती.
---
अपंग बहिणीशी चुकीचे वर्तन
पतीचे घर सोडून आईवडिलांच्या घरी गेल्यावर याचिकाकर्ती पतीकडे परतलीच नाही. तिने केलेले वर्तन पतीसाठी त्रासदायकच होते. त्याच्या मित्रांसमोर त्याला अपमानास्पद वागणूक देणे हेदेखील त्याच्यासाठी क्रौर्यच आहे. त्याच्या अपंग बहिणीशी याचिकाकर्तीचे वर्तनही त्याच्यासह त्याच्या कुटुंबीयांसाठी वेदनादायी असल्याचेही नमूद करून न्यायालयाने याचिकाकर्तीची याचिका फेटाळली.