भिवंडी, ता. १९ (वार्ताहर) : अनधिकृत फलकांमुळे पावसाळ्यात दुर्घटनांची शक्यता अधिक असल्याने भिवंडी पालिका आयुक्त अनमोल सागर यांनी शहरातील अनधिकृत फलकांविरोधात कारवाईची मोहीम सुरू केली आहे. शहरातील विविध भागांतून तब्बल १८२ अनधिकृत फलक हटविल्याची माहिती जाहिरात व परवाना विभागाचे उपायुक्तांनी प्रसिद्धीपत्रकाद्वारे दिली आहे. ही कारवाई यापुढेही सुरू ठेवण्यात येईल. अशा प्रकारचे अनधिकृत पोस्टर्स, फलक लावणाऱ्यांवर यापुढे गुन्हे दाखल करण्यात येतील, असा इशारा देण्यात आला आहे.
सार्वजनिक जागेचा बेकायदा वापर थांबवण्यासाठी महापालिका हद्दीतील मुख्य रस्ते, चौक, उड्डाणपूल, सार्वजनिक उद्याने, वर्दळीच्या ठिकाणी अनधिकृत फलक, बॅनर, पोस्टर यांची वाढती संख्या ही शहराच्या स्वच्छतेला आणि सौंदर्याला बाधा पोहोचवत आहे. अशा प्रकारच्या अनधिकृत जाहिरात, साहित्यामुळे वाहतुकीस अडथळा, सार्वजनिक ठिकाणी अस्वच्छता व दृश्य प्रदूषण निर्माण होत आहे. यावर नियंत्रण ठेवण्यासाठी पालिकेमार्फत विशेष मोहीम राबविण्यात येत आहे. यामध्ये पालिकेची कोणतीही परवानगी न घेता लावलेले बॅनर, फलक, पोस्टर त्वरित हटविण्यात येतील. त्यासोबत असे फलक लावणारे जबाबदार व्यक्ती, संस्था, राजकीय पक्ष यांच्यावर दंडात्मक कारवाई करण्यात येईल, असा इशारा देण्यात आला आहे.