ठाणे पोलिस दलात महिलांची दमदार एन्ट्री
अनुकंपा भरतीतील नऊ महिलांना नियुक्ती पत्र
सकाळ वृत्तसेवा
ठाणे, ता. १९ : सर्वच क्षेत्रांत पुरुषांच्या खांद्याला खांदा लावून काम करण्याची संधी महिलांना मिळाली आहे आणि ती जबाबदारी तितक्याच ताकदीनेही बजावताना महिला दिसत आहेत. त्यातच पोलिस दलात कर्तव्य बजावताना पती किंवा पित्याचे छत्र हरपलेल्या महिलाही आता पोलिस दलात येण्यासाठी सरसावताना दिसत आहेत. गुरुवारी (ता. १७) नऊ जणांना वाटप करण्यात आलेल्या नियुक्तिपत्रांमध्ये तीन महिलांचा समावेश असल्याचेही या वेळी सांगण्यात आले. गेल्या वर्षी नऊ महिलांनी ठाणे शहर पोलिस दलात धाडसाने पाऊल टाकले. त्यांचे पोलिस आयुक्तांकडून स्वागत करण्यात आले.
ठाणे पोलिस आयुक्तालयाअंतर्गत आपले कर्तव्य बजावताना दिवंगत पोलिस अंमलदारांच्या वारसांसाठी अनुकंपा तत्त्वावर भरती प्रक्रिया राबविण्यात येते. या प्रक्रियेसाठी आलेल्या अर्जांनुसार भरती प्रकिया कायदेशीररीत्या राबवून त्या उमेदवारांना नियुक्तिपत्र दिले जाते. त्यानुसार गुरुवारी ठाणे शहर पोलिस आयुक्त आशुतोष डुंबरे यांच्या हस्ते आणि सह पोलिस आयुक्त डॉ. ज्ञानेश्वर चव्हाण यांच्या उपस्थितीत नऊ उमेदवारांना नियुक्तिपत्रे देण्यात आली.
------------------------------
मैदानी प्रकारात सवलत
उंची आणि मैदानी प्रकारात सवलत नियुक्तिपत्र देण्यापूर्वी त्या उमेदवारांची नियमानुसार परीक्षा घेतली जाते. त्यामध्ये उंची आणि मैदानी या दोन प्रकारांत त्यांना सवलत मिळते. इतर प्रकारांत मात्र सवलत मिळत नाही. उदाहरण शिक्षण हे शासकीय नियमानुसार गरजेचे आहे.
-----------------------
प्रक्रिया आठ दिवसांत पूर्ण
या वर्षी आलेल्या अर्जांचा विचार करून २१ जून रोजी प्रक्रियेला सुरुवात झाली. तसेच ती प्रक्रिया २७ जून रोजी पूर्ण केली. या आठ दिवसांत त्या उमेदवारांच्या पोलिस भरतीसाठी आवश्यक बाबी पूर्ण करण्यात आल्या.
-----------------------------
महिलांना असलेल्या आरक्षणानुसार त्यांनी पोलिस दलात येणे आवश्यक आहे. जर महिला पोलिस दलात येत असतील तर त्यांचे स्वागतच आहे. अनुकंपा तत्त्वावरील भरती प्रक्रिया राबविताना कोणताही विलंब न करता पूर्ण करून नियुक्तिपत्रेही वाटप केली आहेत.
- आशुतोष डुंबरे, पोलिस आयुक्त, ठाणे शहर

नियमानुसार प्रक्रिया राबवली गेली असून, यावर्षी आता कोणताही अर्ज शिल्लक राहिलेला नाही. तसेच ठाणे पोलिस आयुक्तालयाअंतर्गत आपले कर्तव्य बजावताना दिवंगत झालेले पोलिस अंमलदारांच्या वारसांकरिता अनुकंपा तत्त्वावर भरती प्रक्रिया राबवून नऊ उमेदवारांना पोलिस आयुक्त आशुतोष डुंबरे यांच्या हस्ते नियुक्तिपत्रे देण्यात आली.
- डॉ. श्रीकांत परोपकारी, उपायुक्त, ठाणे शहर पोलिस, मुख्यालय -१

* ठाणे शहर पोलिस दलातील तक्ता
सन एकूण संख्या पुरुष महिला
२०२५ ०९ ०६ ०३
२०२४ २१ १२ ०९
एकूण ३० १८ १२

...................