ठाणे रेबीजमुक्त होणार
शहरातील दोन वर्षांत १९ हजारांवर भटक्या कुत्र्यांचे होणार लसीकरण

सकाळ वृत्तसेवा
ठाणे, ता. १९ : ठाणे शहरात गेल्या काही महिन्यांपासून भटक्या कुत्र्यांचा प्रश्न गंभीर बनत चालला आहे. या भटक्या कुत्र्यांकडून अनेकदा माणसांवर हल्ले होत आहेत. त्यामुळे रेबीजसारख्या गंभीर आजाराची वेळ लोकांवर येत आहे. याची दाखल घेत ठाणे पालिकेच्या माध्यमातून रेबीजमुक्त ठाणे कार्यक्रम राबविण्यात येत आहे. त्यानुसार मागील दोन वर्षांत १८ हजार ९८९ श्वानांचे लसीकरण करण्यात आले असल्याची माहिती पशुवैद्यकीय विभागाने दिली.
ठाणे पालिका क्षेत्रात भटक्या कुत्र्यांचे प्रमाण वाढत चालले आहे. भटक्या कुत्र्यांकडून अनकेदा लहान बालकांसह प्रौढ व्यक्तींनादेखील लक्ष केले जात आहे. कुत्र्याने घेतलेल्या चाव्यामुळे रेबीजसारखा आजार बळावण्याची शक्यतादेखील वर्तविण्यात येते.
दरम्यान, ठाणे पालिकेच्या पशुवैद्यकीय विभागात अधिकारी आणि कर्मचारी यांचा तुटवडा असल्याकारणाने सामाजिक संस्थांचा व प्राणिमित्र तसेच विविध संस्थांचे स्वयंसेवकांची मदत घेत शहरातील भटक्या श्वानांचे लसीकरण करण्यात येत असल्याची माहिती महापालिका पशुवैद्यकीय अधिकारी डाॅ. क्षमा शिरोडकर यांनी दिली.

--------------------------------------
नेमकी संख्या नाही
ठाणे पालिका क्षेत्रात ३० ते ३५ हजारांवर भटके कुत्र्यांची संख्या असल्याची शक्यता वर्तविली जात आहे. भटक्या कुत्र्यांची गणना झालेली नसल्यामुळे नेमकी कुत्र्यांची संख्या कितीस हे अद्याप समजू शकले नाही. दुसरीकडे भटक्या कुत्र्यांचे लसीकरण करण्याचा निर्णय पालिका प्रशासनाने घेतला असून, यासाठी केंद्र सरकारच्या माध्यमातून राबविण्यात येणाऱ्या रेबीज निर्मूलन या उपक्रमाची जोड देत रेबीजमुक्त ठाणे असा कार्यक्रम हाती घेण्यात आला आहे. पाच वर्षे हा उपक्रम राबविण्यात येणार आहे.
---------------------
११ हजारांवर लसीकरण
पहिल्या वर्षात २६ फेब्रुवारी ते १ मार्च या कालावधीत रेबीजमुक्त कार्यक्रम हाती घेण्यात आला आहे. या वेळी सात हजार ४०७ भटक्या श्वानांचे लसीकरण करण्यात येणार आहे. यंदाच्या वर्षी ११ हजार ५८२ भटक्या श्वानांचे लसीकरण करण्यात आले असल्याची माहिती पालिकेच्या पशुवैद्यकीय विभागाने दिली.
------------------------------