कांदिवली, ता. १९ (बातमीदार)ः मुंबई पालिकेत कार्यरत अभियंत्यांची दोन वर्षांनंतर बदली करणे अथवा होणे, असे पालिका आयुक्ताचे परिपत्रक आहे; परंतु पी. उत्तर विभागातील १६ अभियंते पाच वर्षांपासून एकाच ठिकाणी मुक्कामी आहेत.
पश्चिम उपनगरांतील सर्वाधिक लोकसंख्या असलेल्या मालाड पालिका पी. उत्तर विभाग कार्यालयात १६ अभियंते एकाच विभागात कार्यरत आहेत. विभागातील समस्यांमध्ये वाढ होत आहे. तरीसुद्धा महापालिका मुख्यालयातील नगर अभियंत्यांचे त्याकडे दुर्लक्ष करीत आहेत. परिमंडळ चारअंतर्गत येणाऱ्या पालिका पी. उत्तर विभाग कार्यालयात सहाय्यक अभियंते, दुय्यम अभियंते, कनिष्ठ अभियंते (स्थापत्य) संवर्गातील सुमारे १६ अभियंत्यांचे पाच वर्षांपासून बदल्या झालेल्या नाहीत. परिरक्षणासह इतर विभागात मुक्कामी आहेत. या सर्व अभियंत्यांची नियुक्ती, पदनामांची माहिती माजी नगरसेवक सिरील डिसोजा यांनी माहिती अधिकारातून मागितली होती.
-----------------------------------------------
धरणे आंदोलनाचा इशारा
पी. उत्तर विभागात नागरिकांच्या समस्या, अडचणीकडे दुर्लक्ष होत आहे. प्रभागात अनेक ठिकाणांहून नागरिकांच्या तक्रारी येत असून त्याचे निराकरण होत नाही, म्हणून नागरिकांमध्ये असंतोष आहे. याकडे पालिका आयुक्त, अतिरिक्त आयुक्त आणि उपायुक्त दुर्लक्ष करीत असल्याने गुरुवारी (ता. २४) धरणे आंदोलनाचा इशारा डिसोजा यांनी दिला आहे.
----------------------------------
नगर अभियंता विभागाचा पदभार स्वीकारून मला आठवडा झाला आहे. याविषयी संबंधितांकडून माहिती घेऊन बदली करण्याचे आदेश काढण्यात येतील.
- रामचंद्र कदम, नगर अभियंता