इमारतीच्या सहाव्या मजल्यावरून पडून प्लंबरचा मृत्यू
अंधेरी, ता. १९ (बातमीदार) ः मालाडच्या एका निवासी इमारतीच्या सहाव्या मजल्यावरून पडून कलीम कयूम खान (वय ३९) या प्लंबरचा मृत्यू झाला. याप्रकरणी कुरार पोलिसांनी सोसायटीच्या तीन पदाधिकाऱ्यांविरुद्ध हलगर्जीपणाचा ठपका ठेवत गुन्हा दाखल केला. त्यात सोसायटीचे अध्यक्ष अब्दुल समद मकनोजिया, खजिनदार ममता पाठक आणि सेक्रेटरी बद्रीनाथ मिश्रा यांचा समावेश असल्याचे पोलिसांनी सांगितले.
कलीम खान हा प्लंबर असून, तो त्याच्या पत्नी आणि मुलांसोबत मालाडच्या पठाणवाडीत राहतो. शनिवारी (ता. १३) तो जवळच असलेल्या संजय नगरातील आझाद सोसायटीमध्ये पाइपचे काम करण्यासाठी गेला होता. दुपारी दीड वाजता प्लंबिगचे काम करीत असताना त्याचा कलीमचा तोल गेला आणि तो सहाव्या मजल्यावरून खाली पडला. त्यामुळे त्याला स्थानिक रहिवाशांनी तातडीने जवळच्या शासकीय रुग्णालयात दाखल केले होते. तिथे त्याला डॉक्टरांनी मृत घोषित केले. ही माहिती मिळताच कुरार पोलिसांनी घटनास्थळी धाव घेतली.
चौकशीत सोसायटीच्या पाण्याचे तुटलेल्या पाइप दुरुस्तीचे काम करण्यासाठी एक लोखंडी झुला दोरीच्या मदतीने इमारतीच्या टेरेसवर बांधण्यात आला होता. दरम्यान, काम करताना कलीमला सेफ्टी बेल्ट, हेल्मेट दिले नव्हते. त्याच्या सुरक्षेसाठी इमारतीस सुरक्षा जाळी लावण्यात आली नव्हती. त्यामुळे काम करताना त्याचा तोल गेला आणि तो सहाव्या मजल्यावरून खाली पडला. या घटनेला सोसायटीचे अध्यक्ष अब्दुल कमनोजिया, सचिव बद्रीनाथ मिश्रा आणि खजिनदार ममता पाठक हे जबाबदार असल्याचा आरोप करून आसिफ खान यांनी तिघांविरुद्ध पोलिसांत तक्रार केली होती. या तक्रारीनंतर सोसायटीच्या तिन्ही पदाधिकार्याऱ्यांविरुद्ध पोलिसांनी गुन्हा दाखल केला आहे.