भिवंडी (वार्ताहर) : अंजुरफाटा खारबाव-चिंचोटी-कामण या रस्त्याची प्रचंड दुरवस्था झाली आहे. या रस्त्याच्या देखभाल दुरुस्तीकडे सार्वजनिक बांधकाम विभागासह शासकीय यंत्रणांचे दुर्लक्ष झाले आहे. या रस्त्यावर सुप्रीम इन्फ्रास्ट्रक्चर कंपनीकडून टोलवसुली करण्यात आली होती; मात्र रस्त्याची योग्य देखभाल दुरुस्ती न केल्याने कंपनीला टोल बंद करण्याचे निर्देश देण्यात आले. महिनाभरापासून टोलवसुली बंद असल्याने या रस्त्यावर ना कंपनीचे, ना सार्वजनिक बांधकाम विभागाचे लक्ष आहे. त्यामुळे रस्त्याची प्रचंड दुरवस्था झाली आहे. अंजुरफाटाजवळील ७२ गाळा ते कालवार; तसेच खारबावच्या पुढे रस्त्यावर खड्डे पडले आहेत. त्यामुळे या रस्त्याने प्रवास करणारे स्थानिक ग्रामस्थ, विद्यार्थी, चाकरमान्यांमध्ये अपघाताची भीती आहे.