टोकावडे, ता. १९ (बातमीदार) : मुरबाड तालुक्यात आगामी जिल्हा परिषद आणि पंचायत समिती निवडणुकांच्या पार्श्वभूमीवर राजकीय हालचालींना गती मिळाली आहे. तालुक्यात रविवारी (ता. २०) दोन राजकीय पक्षांचे मेळावे एकाच वेळी होणार आहेत. त्यामुळे निवडणूक रणनीती ठरवण्याच्या हालचालींना बळ मिळणार आहे.
शिवसेना (शिंदे गट), युवा सेना, महिला आघाडी व युवती सेनेच्या वतीने सरळगाव येथील कावेरी हॉलमध्ये सकाळी १०.३० वाजता मेळावा होणार आहे. या वेळी पक्ष संघटना बांधणी, सभासद नोंदणी आणि आगामी स्थानिक स्वराज्य संस्थांच्या निवडणुकांची तयारी यावरील मार्गदर्शन होणार आहे. या कार्यक्रमाला शिवसेनेचे नेते प्रकाशजी पाटील, शिवसेनेचे उपनेते माजी आमदार रूपेश म्हात्रे, शिवसेनेचे उपनेते, जिजाऊ संघटना संस्थापक अध्यक्ष नीलेश सांबरे, जिल्हाप्रमुख अरविंद मोरे व युवा सेना अध्यक्ष प्रभुदास नाईक उपस्थित राहणार आहेत. तर दुसरीकडे शिवळे येथील शैक्षणिक संकुलात सकाळी १०.३० वाजता माजी आमदार गोटीराम पवार यांच्या उपस्थितीत माजी जिल्हा परिषद उपाध्यक्ष सुभाष पवार यांनी निष्ठावंत कार्यकर्त्यांशी सुसंवाद साधण्यासाठी कार्यकर्ता मेळावा आणि स्नेहभोजनाचे आयोजन केले आहे. यामध्ये माजी पंचायत समिती, बाजार समितीचे पदाधिकारी, सहकारी संस्था, ग्रामपंचायतींचे सदस्य,महिला व युवक कार्यकर्ते मोठ्या संख्येने सहभागी होणार आहेत. या दोन्ही कार्यक्रमांमधून पक्षीय बळकटपणा, कार्यकर्त्यांशी संवाद व आगामी निवडणुकांची रणनीती ठरवण्याचे स्पष्ट संकेत मिळत आहे. आजचा रविवार तालुक्यात राजकीयदृष्ट्या अत्यंत महत्त्वाचा ठरणार आहे.