घाटकोपर, ता.१९(बातमीदार) ः बौद्धिक अक्षम खेळाडूंसाठी स्पेशल ओलंपिकस भारत संस्थेच्या माध्यमातून ३ ते ६ ऑगस्ट या कालावधीत राष्ट्रीय जलतरण स्पर्धा कांदिवलीतील सरदार वल्लभभाई पटेल जलतरण तलाव होणार आहे. या स्पर्धेत १४ ते १७ वर्षांवरील गटातील देशभरातील ३५० हून अधिक खेळाडू सहभागी होणार आहेत.
स्पेशल ओलंपिकस् भारत ही संस्था गेली अनेक वर्षापासून बौद्धिक अक्षम मुला-मुलींच्या सर्वांगीण विकासासाठी क्रीडा, आरोग्य विषयक उपक्रमाद्वारे कार्यरत आहे. या संस्थेमार्फत विविध खेळाडूंनी आंतरराष्ट्रीय स्पर्धेत पदके मिळवली आहेत. या खेळाडूंना ऑलम्पिकसारख्या आंतरराष्ट्रीय स्पर्धेमध्ये सहभागासाठी तयारी, अनुभव मिळावा या उद्देशाने ही जलतरण स्पर्धा होणार आहे. या स्पर्धेसाठी डॉ. मेधा सोमय्या अध्यक्षा, डॉ. भगवान तलवारे क्षेत्र संचालक, जितेंद्र ढोले स्पोर्ट्स डायरेक्टर, भारती मराठे कार्यक्रम अधिकारी, सुनील आडे कॅम्प इन्चार्ज, समन्वयक भाग्यश्री वर्तक, विनोद चाळक, अनुराधा जठार मेहनत घेत आहेत. या स्पर्धेसाठी संस्थेच्या अध्यक्षा मल्लिका नड्डा, केंद्रीय मंत्री पियुष गोयल, पालिकेचे वरिष्ठ अधिकारी उपस्थित राहणार आहेत.