नेरूळ येथील मीनाताई ठाकरे रुग्णालयात आयसीयू सुरू
तुर्भे, ता. १९ (बातमीदार) ः राष्ट्रवादी काँग्रेस पक्ष-शरद पवार पक्षाच्या दणक्यानंतर नवी मुंबई महानगरपालिकेने नेरूळ येथील मीनाताई ठाकरे रुग्णालयात अतिदक्षता विभाग सुरू केला आहे. कित्येक वर्षांपासून आयसीयू बंद असल्यामुळे रुग्णांचे हाल होत होते व नाहक जीवदेखील जात होते. यासंदर्भात आयसीयू सुरू करण्यासाठी राष्ट्रवादी काँग्रेस पक्ष-शरद पवार पक्षाच्या वतीने नवी मुंबई महानगरपालिकेचे वैद्यकीय आरोग्य अधिकारी डॉ. प्रशांत जवादे यांना घेराव घालून तत्काळ आयसीयू सुरू करण्याची मागणी केली होती.
राष्ट्रवादीच्या आक्रमक पवित्र्यानंतर डॉ. प्रशांत जवादे यांनी सात दिवसांत पाच आयसीयू बेड्स सुरू करू व मनापाच्या भरती प्रक्रिया पूर्ण झाल्यानंतर अधिक संख्येने आयसीयू बेड्स सुरू करू, असे लेखी आश्वासन दिले होते. आता या रुग्णालयात आयसीयू सुरू झाले आहेत. हे आयसीयू बेड्स सुरू करण्यासाठी डॉ. उद्धव खिलारे यांनी केलेल्या सहकार्याबद्दल त्यांची भेट घेऊन आभार मानले. या वेळी वैद्यकीय सेलचे जिल्हा अध्यक्ष तुषार कचरे,
युवक काँग्रेसचे विशाल भिलारे, संदीप मोहिते, राम पुजारे, विश्वजित भोईटे, केतन वालकर उपस्थित होते.